រាជធានីភ្នំពេញ ៖ នៅព្រឹកថ្ងៃទី១២ ខែមិថុនា ឆ្នាំ២០១៩ នៅក្នុងពិធីប្រកាសចូលកាន់តំណែងក្រុមប្រឹក្សារាជធានីភ្នំពេញ អាណត្តិទី៣ សម្តេចក្រឡាហោម ស ខេង មានប្រសាសន៍ថា តាមព័ត៌មានខ្ញុំបានដឹង ទីផ្សារដីឡើងថ្លៃក៏ដោយសារមនុស្សមួយក្រុមដែលយកលុយខៅ្ម ឬប្រផេះ មកចាយវាយនៅកម្ពុជា ទើបធ្វើឲ្យទីផ្សារដីឡើងថ្លៃផងដែរ ។
សូមបញ្ជាក់ផងដែរថា ការលើកឡើងរបស់ប្រមុខដឹកនាំក្រសួងមហាផ្ទៃនេះ ស្របពេលដែលដីនៅតាមបណ្តាខេត្តមួយចំនួនបានហក់ឡើងថ្លៃយ៉ាងខ្លាំង ក្នុងនោះមានខេត្តព្រះសីហនុ កណ្តាល តាកែវ កំពង់ស្ពឺ ជាដើម។
សម្តេចក៏បានបញ្ជាដល់សមត្ថកិច្ចធ្វើការចាត់វិធានការឲ្យបានម៉ឹងម៉ាត់ចំពោះអ្នកដែលនាំលុយបែបនេះចូលមកក្នុងប្រទេស ដោយមិនត្រូវលើកលែងនោះទេ ។សម្ដេចក្រឡាហោម ស ខេង បានបញ្ជាក់ថា ៖ រឿងលាងលុយ ឥឡូវនេះកម្ពុជាត្រូវគេចាត់ទុកថាជាប្រទេសប្រផេះ ចឹងគេឃ្លាំមើល ព្រោះមួយជំហានទៀតវានឹងទៅខ្មៅ បើសិនណាយើងមិនយកចិត្តទុកដាក់ ។
សម្ដេចក្រឡាហោមវាយតម្លៃថា ៖ អ្នកឃុបឃិតរកស៊ីរឿងនេះបាន មានតែមនុស្សមួយក្រុមទេ ប៉ុន្ដែបើងាប់ គឺងាប់ប្រទេសនិងប្រជាជាតិ ។ បើថ្ងៃណាមួយគេចាត់ទុកថា កម្ពុជាជាប្រទេសខ្មៅលាងលុយចប់ ដែលប្រឈមនឹងការលំបាក ។ សម្ដេចក្រឡាហោម ស ខេង បញ្ជាក់ទៀតថា ប្រសិនបើស្រាវជ្រាវរកឃើញមានបទល្មើសនេះ ត្រូវរាយការណ៍ភ្លាមទៅសម្ដេចផ្ទាល់ ដើម្បីមានវិធានការស្រាវជ្រាវ និងឈានដល់ការបង្ក្រាបជាក់ស្ដែងតែម្តង ។ សម្ដេចក្រឡាហោម ក៏បានក្រើនរំលឹកថា ៖ អ្នកដែលប្រព្រឹត្តបទល្មើសនេះ គឺពិតជាមានល្បិចខ្ពស់ណាស់ ដូច្នេះហើយសមត្ថកិច្ចដែលមានការពាក់ព័ន្ធ ពិសេស អគ្គស្នងការដ្ឋាននគរបាលជាតិ ត្រូវបង្កើនការប្រុងប្រយ័ត្នលើករណីនេះ ។
សូមរំលឹកថា ការលើកឡើងរបស់សម្តេចក្រឡាហោម ស ខេង បែបនេះ បន្ទាប់ពីសមត្ថកិច្ចបានឃាត់ខ្លួនឈ្មួញចិនចំនួន៤នាក់ដែលនាំថវិកាជាង៤លានដុល្លារអាមេរិកពីប្រភពមិនច្បាស់លាស់ ចូលស្រុកខ្មែរកាលពេលថ្មីៗនេះ នៅច្រកព្រលានយន្តហោះអន្តរជាតិ ។ ជាការពីតគេត្រូវទទួលស្គាល់ថា កន្លងមកមានក្រុម Mafia បានឃុបឃឹតគ្នា យកលុយខ្មៅមកចាយនៅស្រុកខ្មែរ ដូចជាមកទីញដី ទីញផ្ទះ ដែលធ្វើឲ្យតម្លៃហក់ឡើងកប់ពពក ។
កាលពីខែកុម្ភៈ ឆ្នាំ២០១៩ មានអង្គការអន្តរជាតិសំរាប់តាមដានការលាងលុយកខ្វក់ និងលុយភេរវកម្ម ឈ្មោះ FInancial Action Task Foce (FATF) មានទីស្នាក់ការនៅទីក្រុងប៉ារីស ប្រទេសបារាំង និងមានសមាជិកជាង៣០ ប្រទេស បាននិងកំពុងតាមដានការចរាចរលុយខ្មៅ ដោយអង្គការមួយនេះបានដាក់ កម្ពុជា ក្នុងតំបន់ពណ៍ប្រផេះ (Gray List ៕
