រាជធានីភ្នំពេញ ៖ ក្រុមប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានធ្វើការប្រកាសបកស្រាយថា មិនមានករណីនេះកើតឡើងទេ ក្រោយពីមានការចុះផ្សាយ និងចែកចាយបន្តគ្នាពីករណីមានបុរសម្នាក់បានបើករថយន្តទៅបុក នឹងចូលក្បួនថ្នាក់ដឹកនាំនោះ។
លោកវរសេនីយ៍ឯក សែម គន្ធា នាយការិយាល័យចរាចរណ៍ផ្លូវគោកបានឲ្យដឹងថា នៅវេលាម៉ោង៥ព្រឹក ថ្ងៃទី១៣ ខែមិថុនា ឆ្នាំ២០១៩ កងកម្លាំងចរាចរណ៏ នគរបាលផ្លូវគោក ដែលរៀបចំសណ្តាប់ធ្នាប់នៅតាមដងផ្លូវ និងសម្រួលចរាចរណ៏ជូនគណ:ប្រតិភូជាតិ អន្តរជាតិ ក៏ដូចជាប្រជាពលរដ្ឋនៅតំបន់នោះ បានឃើញរថយន្តម៉ាកព្រុសមួយគ្រឿងពាក់ស្លាកលេខភ្នំពេញ 2AZ-5242 បើកបរដោយបុរសម្នាក់ក្នុងល្បឿនលឿន ហើយរេចង្កូតពេញផ្លូវ ទើបក្រុមអន្តរាគមន៍ចរាចរណ៏ចល័ត តាមឃាត់រថយន្តនោះដើម្បីធ្វើការឃាត់ខ្លួនអ្នកបើកបរ និងជៀសវាងការបង្ករគ្រោះថ្នាក់ជាយថាហេតុ។
កម្លាំងនគរបាលបានឃាត់រថយន្តនោះបាននៅតាមបណ្តោយផ្លូវសហព័ន្ធរុស្សី ជិតរោងចក្រមិថុនា នៅខណ្ឌសែនសុខ ហើយបន្ទាប់ពីការត្រួតពិនិត្យរួច បានបង្ហាញឲ្យឃើញថា បុរសម្នាក់នោះមានសារជាតិស្រវឹង៕
