រាជធានីភ្នំពេញ ៖ លោក ផែង វណ្ណៈ ដែលកំពុងស្ថិតក្នុងពន្ធនាគារព្រៃសត្រូវបានគេរាយការណ៍ថា បានសរសេរលិខិតសុំការខន្តីអភ័យទោសពីសម្តេច ហ៊ុន សែន នូវអ្វីដែលខ្លួនបានសរសេរព័ត៌មាន ប្រៀបធៀបមិនសមរម្យ តាមរយៈបណ្តាញសង្គមហ្វេសប៊ុក នាំឲ្យមានកំហុសនាពេលកន្លងទៅ ។
យោងតាមលិខិតនោះ លោក ផែង វណ្ណៈ បានលើកឡើងថា «ទង្វើដ៏ឆ្គាំឆ្គងរបស់ខ្លួនកើតឡើង ដោយសារការភ្លេចខ្លួននិងអារម្មណ៍ឆេវឆាវ ខ្វះការពិចារណា ច្រឡោត ខឹងសម្បា ទៅលើអ្នកលេងហ្វេសប៊ុកមួយចំនួន ដោយមិនបានគិតវែងឆ្ងាយ ជាហេតុនាំឲ្យប៉ះពាល់ដល់កិត្តិយស សម្តេចដែលជាប្រមុខដឹកនាំដ៏ល្អប្រពៃ នៃប្រជាជនកម្ពុជា។
លោក ផែង វណ្ណៈ ក៏បានបញ្ជាក់ថា លោកនឹងចងចាំនូវកំហុសឆ្គងកន្លងមកនេះ ដោយសន្យាថា នឹងធ្វើការកែប្រែអត្តចរិត ពាក្យសម្តីរបស់ខ្លួន និងមិនឲ្យបញ្ហាទាំងនេះកើតឡើង ជាថ្មីម្តងទៀតនោះឡើយ៕
