រាជធានីភ្នំពេញ ៖ យោងតាមការបញ្ជាក់របស់មន្ត្រីអ្នកនាំពាក្យសាលាដំបូងរាជធានីភ្នំពេញ សាលាដំបូងរាជធានីភ្នំពេញ បានសម្រេចចោទប្រកាន់មនុស្ស១៧នាក់ ពីបទជួញដូរគ្រឿងញៀនដោយខុសច្បាប់ ក្នុងសំណុំរឿងក្លិបកំសាន្តលុច្សសារី ដែលត្រូវបានសមត្ថកិច្ចបង្ក្រាបកាលពីពេលថ្មីៗនេះ ។
លោក លី សុផាន់ណា អ្នកនាំពាក្យសាលាដំបូងរាជធានីភ្នំពេញ ត្រូវបានសារព័ត៌មានក្នុងស្រុកដកស្រង់សំដីយកមកចុះផ្សាយដោយលោកបានបញ្ជាក់ថា ក្រៅពីបទចោទជួញដូរគ្រឿងញៀនដោយខុសច្បាប់ ជនល្មើសចំនួន១៧នាក់នេះ រងការចោទប្រកាន់ពីបទសមគំនិតតាមរយៈ ការសម្រួលនិងចាត់ចែងឲ្យប្រើប្រាស់សារធាតុញៀន រួមនឹងការរក្សាទុកសារធាតុញៀនដោយខុសច្បាប់។ លោកថា តំណាងអយ្យការបានបញ្ជូនជនល្មើស១៧នាក់ និងសំណុំរឿងទៅចៅក្រមស៊ើបសួរ ដើម្បីចាត់ការបន្ត។
សូមជម្រាបថា ក្នុងចំណោមជនល្មើស១៧នាក់ ដែលតុលាការសម្រេចចោទប្រកាន់នោះ គឺ៥នាក់ជាជនជាតិវៀតណាម។ ជនជាតិរៀតណាម៥នាក់នេះ ស្ថិតក្នុងចំណោមមនុស្ស៤០៨នាក់ដែលមានជនជាតិខ្មែរ ចិន ម៉ាឡេស៊ី និងសិង្ហបុរី ដែលកងកម្លាំងនគរបាលស្នងការដ្ឋានគរបាលរាជធានីភ្នំពេញចុះទៅឃាត់ខ្លួននៅក្លិបលុច្សសារី កាលពីយប់រំលងអាធ្រាត្រឈានចូលថ្ងៃទី៨ ខែមិថុនា កន្លងទៅនេះ ដែលសាធារណជនកំពុងតាមដានករណីនេះយ៉ាងដឹតដល់៕
