រាជធានីភ្នំពេញ ៖ លោកឧត្តមសេនីយ៍ឯក ឌី វិជ្ជា ដែលត្រូវជាកូនប្រុសបង្កើតរបស់នាយឧត្តមសេនីយ៍ ហុក ឡង់ឌី អតីតអគ្គស្នងការនគរបាលជាតិ និងជាកូនប្រសារសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញមុខច្រានចោលចំពោះការលើកឡើងរបស់ទណ្ឌិត សម រង្ស៊ី មេចលនាក្រុមឧទ្ទាមក្រៅច្បាប់ដែលបានចោទប្រកាន់ថា សម្តេច ហ៊ុន សែន ពាក់ព័ន្ធនឹងការស្លាប់របស់ឪពុករបស់លោក ហើយក៏ចាត់ទុកការលើកឡើងរបស់ទណ្ឌិត សម រង្ស៊ី គឺជាការមួលបង្កាច់ ប្រឌិតព័ត៌មាន និងញុះញង់បំបែកបំបាក់ផ្ទៃក្នុងតែប៉ុណ្ណោះ។
លោកឧត្តមសេនីយ៍ឯក ឌី វិជ្ជា បានថ្លែងប្រាប់សារព័ត៌មានក្នុងស្រុកថា ក្នុងនាមខ្លួនលោកផ្ទាល់ជាកូនប្រុសរបស់អតីតអគ្គស្នងការនគរបាលជាតិ នាយឧត្តមសេនីយ៍ ហុកឡង់ឌី លោកកត់សម្គាល់ឃើញថា កន្លងមកថ្មីៗ នេះបុគ្គលទណ្ឌិត សម រង្ស៊ី និងបក្ខពួកបាន ព្យាយាមបង្កចលាចលដោយការផ្សព្វផ្សាយព័ត៌មានប្រឌិតលើរូបលោក ដើម្បីធ្វើឲ្យមតិជាតិនិងអន្តរជាតិមានការភ័ន្តច្រឡំជុំវិញការស្លាប់របស់ឪពុកលោក កាលពីថ្ងៃទី៩ ខែវិច្ឆិកា ឆ្នាំ២០០៨កន្លងទៅ ។
លោកបញ្ជាក់ថា ការស្លាប់របស់ឪពុកខ្ញុំ ក្នុងឧបទ្ទវហេតុធ្លាក់ឧទ្ធម្ភាគចក្រ ដោយសារកត្តាអាកាសធាតុ ប៉ុន្តែត្រូវបានទណ្ឌិត សម រង្ស៊ី យកទៅធ្វើជាឧបាយកលទុច្ចរិតក្នុងការបម្រើមហិច្ឆតានយោបាយរបស់ខ្លួន ដោយឥតអៀនខ្មាស់ ងងឹតងងល់ហ៊ានប្រើឈ្មោះរបស់សពដើម្បីប្រឌិតរឿងបំបែកបំបាក់ផ្ទៃក្នុង នៃថ្នាក់ដឹកនាំរាជរដ្ឋាភិបាល ក៏ដូចជាក្រុមគ្រួសារខ្ញុំ ។
លោកឧត្តមសេនីយ៍ឯក ឌី វិជ្ជា បានបន្តថា នេះមិនមែនជាលើកទីមួយទេ ដែលទណ្ឌិត សម រង្ស៊ី ហ៊ានប្រឌិតព័ត៌មានមិនពិត និងបង្កើតព័ត៌មានញុះញង់ ដើម្បីបំផ្លាញស្ថិរភាពសង្គម និងសាមគ្គីជាតិ ជាក់ស្ដែងដូចកន្លងមក មានការបង្កើតគណនីហ្វេសប៊ុក ក្លែងក្លាយបន្លំឈ្មោះថ្នាក់ដឹកនាំរាជរដ្ឋាភិបាល វាយប្រហារទៅលើប្រមុខរាជរដ្ឋាភិបាល និងញុះញង់ឲ្យយោធាធ្វើសកម្មភាពផ្ដូលរំលំរដ្ឋាភិបាលជាដើម។ ការនិយាយផ្ដេសផ្ដាសគ្មានការពិត និងខ្វះការទទួលខុសត្រូវបានក្លាយទៅជាទម្លាប់អាក្រក់របស់ទណ្ឌិត សម រង្ស៊ី ទៅហើយ។
យ៉ាងណាក៏ដោយលោកឧត្តមសេនីយឯករូបនោះបានបង្ហើបថា លោកកំពុងឲ្យមេធាវីសិក្សាផ្លូវច្បាប់ និងពិនិត្យមើលរៀបចំឯកសារដើម្បីប្ដឹងទណ្ឌិតរូបនោះផងដែរ។
ពាក់ព័ន្ធករណីនេះផងដែរ សម្តច ហ៊ុន សែន ធ្លាប់បានថ្លែងថា សម្តេចបាននិងកំពុងពិភាក្សា នឹងសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី ក្រសួងមហាផ្ទៃ ដើម្បីសិក្សា ផ្លូវច្បាប់រៀបចំ ពាក្យបណ្ដឹង ទៅកាន់ តុលាការស្រុកបារាំងតែម្តង ដើម្បីស្វែងរក យុត្តិធម៌ជាសាកលលើករណី ដែលទណ្ឌិត សម រង្ស៊ី បានចោទប្រកាន់សម្ដេច ទាំងពីរដោយបំពាននោះ។
សូមជម្រាបថាការច្រានចោលនេះ គឺបន្ទាប់ពីទណ្ឌិត សមរង្ស៊ី កាលពីថ្ងៃទី២ ខែមិថុនា ឆ្នាំ២០១៩ បានសរសេរលើទំព័រហ្វេសប៊ុករបស់ខ្លួន ដោយបានញុះញង់ និងបំបែកបំបាក់ផ្ទៃក្នុងរបស់គណបក្សប្រជាជនកម្ពុជា ឲ្យមានការយល់ច្រឡំពីសំណាក់ប្រជាពលរដ្ឋ និងមជ្ឈដ្ឋានជាតិ និងអន្តរជាតិ៕
