រាជធានីភ្នំពេញ ៖ ករណីបុរសជាងសំណង់ម្នាក់ត្រូវវេរ៉ង់ដាបាក់សង្កត់លើ បណ្តាលឲ្យស្លាប់ភ្លាមៗនៅនិងកន្លែង ខណះពេលគាត់កំពុងធ្វើការងារវាយការ៉ូនៅខាងក្រោម បានធ្វើឲ្យភ្ញាក់ផ្អើលដល់អ្នកចូលហូបគុយទាវនៅក្នុងហាងជាប់ទីតាំងកើតហេតុនោះភ័យរត់ជាន់ជើងគ្នាព្រលឹងចុងសក់។
ហេតុការណ៍នេះបានកើតឡើងកាលពីវេលាម៉ោង៨និង១០នាទីព្រឹកថ្ងៃទី១០ ខែមិថុនា ឆ្នាំ២០១៩ ស្ថិតនៅក្នុងការដ្ឋានសំណង់ជាប់ហាងគុយទាវផ្ទះលេខ១Gផ្លូវលេខ៣៦កែងផ្លូវជាតិលេខ៥ ក្រុម១ ភូមិត្តភាព សង្កាត់ឬស្សីកែវ រាជធានីភ្នំពេញ។
បុរសរងគ្រោះមានឈ្មោះ រ៉ន ខុម អាយុ២៩ឆ្នាំ ស្នាក់នៅការដ្ឋានកើតហេតុ និងមានស្រុកកំណើតនៅភូមិសំរោង ឃុំចុងដូងស្រុកបារាយ៍ ខេត្តកំពង់ធំ។ ក្រោយកើតហេតុភ្លាមៗ សមត្ថកិច្ចមូលដ្ឋាននិងសមត្ថកិច្ចជំនាញចុះមកដល់ចំណុចកើតហេតុដើម្បីធ្វើការត្រួតពិនិត្យ ធ្វើកោសល្យវិច្ឆ័យ និងធ្វើកំណត់ហេតុរួចប្រគល់សពឲ្យក្រុមគ្រួសារដឹកយកទៅធ្វើបុណ្យនៅស្រុកកំណើត៕