រាជធានីភ្នំពេញ ៖ នារសៀលថ្ងៃទី៧ មិថុនា នេះ យោងតាមសេចក្ដីប្រកាសព័ត៌មាន របស់ក្រសួងការបរទេសខ្មែរ បានឲ្យដឹងថា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានទទួលទូរស័ព្ទ និងសន្ទនាជាមួយ លោក Vivian Balakrishnan រដ្ឋមន្ត្រីក្រសួងការបរទេសសិង្ហបុរី ទាក់ទងនឹងករណីសារតាមទំព័រ Facebook របស់ឯកឧត្តម Lee Hsien Loong នាយករដ្ឋមន្ត្រីសិង្ហបុរី ដែលបានលើកឡើងពាក់ព័ន្ធនឹងវត្តមានកងទ័ពវៀតណាមនៅកម្ពុជា ក្រោយរបបខ្មែរក្រហម។
លោករដ្ឋមន្ត្រីការបរទេសសឹង្ហបុរី បានលើកឡើងថា លោកនាយករដ្ឋមន្ត្រី លី សានឡុង(Lee Hsien Loong) ផ្តល់សារសំខាន់ខ្លាំងដល់ទំនាក់ទំនង ទ្វេភាគីរវាងប្រទេសសិង្ហបុរី និងប្រទេសកម្ពុជា ដែលបច្ចុប្បន្ននេះមានការ រីកចម្រើនជាលំដាប់នៅលើគ្រប់វិស័យ និងបានបញ្ជាក់ថា ឯកឧត្តមយល់អំពីទុក្ខវេទនា និងការឈឺចាប់របស់ប្រជាជនកម្ពុជា ក្នុងរបបខ្មែរក្រហម។
លោករដ្ឋមន្ត្រីការបរទេស Vivian បានបញ្ជាក់អះអាងថា “ពុំមានចេតនាមិនល្អណាមួយ ក្នុងសារខាងលើនេះទេ។ សារនោះ គឺមានបំណងគ្រាន់តែរំលឹកពីស្ថានភាព និងការប្រឈមក្នុងសម័យកាលនោះ ហើយក៏ធ្លាប់បានផ្សព្វផ្សាយ ជាសាធារណៈក្នុងពេលកន្លងមកដែរ” ។
លោករដ្ឋមន្ត្រីក្រសួងការបរទេសសិង្ហបុរី បានទូរស័ព្ទមកបញ្ជាក់ប្រាប់លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសខ្មែរ បញ្ជាក់ពីជំហរសិង្ហបុរីថា ពុំមានបំណងណាមួយគាំទ្រខ្មែរក្រហម ហើយក៏មិនចង់ឃើញរបបនេះ វិលត្រឡប់មកកម្ពុជាវិញទេ។
លោកវីវៀនបាឡាគ្រីស្ណាន បានបញ្ជាក់ថា សិង្ហបុរីចង់បានតែសន្តិភាព និងវិបុលភាពសម្រាប់កម្ពុជាតែប៉ុណ្ណោះ ពុំមានបំណងណាមួយគាំទ្រខ្មែរក្រហម ហើយមិនចង់ឃើញរបបនេះវិលត្រឡប់មកកម្ពុជាវិញទេ។ សូមកុំឱ្យមានការសង្ស័យអ្វីលើភាពស្មោះត្រង់នេះ។
សូមបញ្ជាក់ដែរថា ៖ កាលពីយប់ថ្ងៃទី៦ មិថុនា សម្ដេចតេជោ ហ៊ុន សែន នាយករដ្ឋមន្ត្រី បានសរសេរសារប្រតិកម្មលើបណ្ដាញសង្គមហ្វេសប៊ុកថា “ខ្ញុំពិតជាមានការសោកស្តាយខ្លាំងណាស់ដែល ឯឧ នាយករដ្ឋមន្ត្រីសឹង្ហបុរី លី ស៊ានឡុង បានបង្ហោះតាមទំព័រហ្វេសប៊ុក កាលពីថ្ងៃទី៣១ ខែឧសភា កន្លងទៅ ដោយលើកឡើងថា ពេលដែលគាត់ (ឧត្តមសេនីយ៍ ព្រេម) ធ្វើជានាយករដ្ឋមន្ត្រី (ថៃ) គាប់ជួននឹងពេលដែលសមាជិក ASEAN (កាលនោះគ្នាយើង ៥ប្រទេស) រួមគ្នាប្រឆាំងការឈ្លានពាន របស់វៀតណាមមកលើកម្ពុជា និងប្រឆាំងរដ្ឋាភិបាលកម្ពុជា ដែលបានជំនួសខ្មែរក្រហម ។ ការលើកឡើងនេះបង្ហាញថា កាលនោះសឹង្ហបុរី បានគាំទ្ររបបប្រល័យពូជសាសន៍ និងចង់ឲ្យរបបប្រល័យពូជសាសន៍ វិលត្រឡប់មកកម្ពុជាវិញដែរ” ។សម្តេចតេជោសួថា តើការកាត់ទោសមេដឹកនាំខ្មែរក្រហមត្រឹមត្រូវដែរឬអត់?៕
