រាជធានីភ្នំពេញ ៖ នៅព្រឹកថ្ងៃទី០៦ ខែមិថុនា ឆ្នាំ២០១៩នេះ ថ្លែងនៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យពុទ្ធិសាស្ត្រ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រាប់ទៅក្រុមអ្នកគាំទ្រអតីត បក្សប្រឆាំងថា គ្មានទេការចរចានយោបាយណាមួយ ទោះបីជាគណបក្សកាន់អំណាច និងអតីតគណបក្សប្រឆាំង បានដាក់ចេញនូវយុទ្ធនាការដូចគ្នា គឺទទួលទាននំបញ្ចុក ទូទាំងប្រទេស នាថ្ងៃអាទិត្យ ថ្ងៃទី០៩ ខែមិថុនា ឆ្នាំ២០១៩ ក៏ដោយ។
សម្តេច ហ៊ុន សែន បញ្ជាក់ថា យុទ្ធនាការហូបនំបញ្ចុកសាមគ្គី និងឯកភាពជាតិ បានធ្វើឱ្យនំ បញ្ចុក ដែលជាផលិតផលខ្មែរនេះត្រូវប៉ាន់ ហើយអាចនឹងមានការផលិតនំបញ្ចុករហូតដល់ រាប់ពាន់តោនឯណោះ។ ប៉ុន្តែសុំកុំយកបញ្ហានេះ ធ្វើជាការវិភាគអ្វីផ្សេង ក្រៅពីរឿងស៊ីនំបញ្ចុក ព្រោះអ្នកខ្លះគិតថា វាជាជំហានទៅដល់ការចរចានយោបាយដូច្នេះ សុំកុំភាន់ច្រឡំ ព្រោះសម្តេចនិយាយតែរឿងនំបញ្ចុកសុទ្ធសាធ និងសាមគ្គីភាព ឯកភាពជាតិ តាមរយៈការទទួលទាននំបញ្ចុកថ្ងៃ៩មិថុនានេះ ៕
