ភ្នំពេញ ៖ រសៀលថ្ងៃទី៣ ខែមិថុនា ឆ្នាំ២០១៩ នេះ សមាគមចំនួន៨ បានជួបប្រជុំគ្នានៅភោជនីយ៍ដ្ឋានមួយក្នុងរាជធានីភ្នំពេញ ពិភាក្សាផ្តោតលើស្ថានភាពអ្នកកាសែតនាពេលបច្ចុប្បន្ន។ ហើយនៅពេលនេះមានពាក្យបណ្តឹងប្រឆាំងអ្នកកាសែតចំនួន៤ករណីផ្សេងគ្នា ដូចជានៅខេត្តកោះកុង ព្រះសីហនុ សៀមរាប និងកំពត។
បើតាមលោក សុខ សុវណ្ណ ប្រធានក្រុមប្រឹក្សាសារព័ត៌មានកម្ពុជា បានថ្លែងបញ្ជាក់ប្រាប់ បណ្តាញពត័មានថា ពាក្យបណ្តឹងទាំងនោះមិនបានយកច្បាប់ស្តីពីរបបសារព័ត៌មានមកប្រើនោះទេ ពេលមុនគេប្រើបទកំហែងយក តែពេលនេះគេប្រើបទញុះញង់អោយប្រព្រឹត្តបទឧក្រិដ្ឋជាអាទ៍ ដែលជាបទល្មើសព្រណទណ្ឌ័មួយថ្មី និងនិយមប្រើស្ទើរតែគ្រប់សាលាដំបូង។
ទន្ទឹមនេះ លោកបណ្ឌិត ម៉េង សុភ័ណ្ឌ អគ្គនាយកទូរទស្សន៍អនឡាញ msj tv online បានសង្កត់ធ្ងន់ថា លោកមានគំនិតដើម្បីអញ្ចើញប្រធានសមាគម និងចាងហ្វាងមកពីភាក្សាថ្ងៃនេះ សំខាន់យើងរៀបចំញត្តិគោរពជូន សម្តេចតេជោ នាយករដ្ឋមន្ត្រី និង ឯកឧត្តម រដ្ឋមន្រ្តីក្រសួងព័ត៌មាន និង ឯកឧត្តម រដ្ឋមន្រ្តីក្រសួងយុត្តិធម៌ ដើម្បីស្នើសុំអោយសាលាដំបូងរាជធានី-ខេត្តប្រើប្រាស់ច្បាប់ស្តីពីរបបសារព័ត៌មាន មកប្រើចំពោះអ្នកសារព័ត៌មាន។
មិនខុសពីលោកបណ្ឌិត ម៉េង សុភ័ណ្ឌ ប្រធានសមាគមអ្នកកាសែតខ្មែរសន្តិភាព លោក កង ចាន់ចំរ៉ុងបានឯកភាពនិងស្នើសុំអោយមានការប្រជុំគ្នាបន្តទៀតនៅថ្ងៃទី៩ ខែមិថុនាខាងមុខ។
គួរបញ្ជាក់ថាកាលពីពេលថ្មីៗនេះ ឯកឧត្តម រដ្ឋមន្រ្តីក្រសួងព័ត៌មាន បានថ្លែងថា អ្នកសារព័ត៌មាន ដែលមានអាជ្ញាប័ណ្ណពិតប្រាកដ គឺធានាដោយច្បាប់ស្តីពីររបបសារព័ត៌មាន និងមានកាតព្វកិច្ចទទួលការបំភ្លឺ នៅពេលផ្សាយមានកំហុសឆ្គងនោះ៕
