ខេត្តព្រះសីហនុ ៖ ជនសង្សយ័ជាឃាតករឈ្មោះ មៀង វិចិត្រ ដែលជាប់សង្ស័យករណីឃាតកម្ម រំលោភសម្លាប់ក្មេង២នាក់នៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ត្រូវបានតំណាងអយ្យការចោទប្រកាន់ជាផ្លូវការតាមដីកាសន្និដ្ឋានបញ្ជូនរឿងអោយស៊ើបសួរចំនួន២បទល្មើស នៅរសៀលថ្ងៃទី៤ ខែមិថុនា ឆ្នាំ២០១៩ ។
បទល្មើសទាំង២ ទី១-បទឃាតកម្មមានស្ថានទម្ងន់ទោសទាក់ទងនឹងជនរងគ្រោះ មាត្រា២០២ ចំណុចទី១ នៃក្រមព្រហ្មទណ្ឌ និងទី២-បទឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈមាត្រា២០៥ នៃក្រមព្រហ្មទណ្ឌ។
សូមរំលឹកថា ឃាតកម្មដ៏ព្រៃផ្សៃមួយបានកើតឡើងកាលពីថ្ងៃទី២៩ ឧសភា បង្កឡើងដោយជនល្មើសចាប់រំលោភកុមារី អាយុជាង១០ឆ្នាំ បន្ទាប់មកធ្វើសកម្មភាពសម្លាប់ទាំងកុមារី និងកុមារជាប្អូនអាយុប្រហល៣ឆ្នាំដែលកំពុងដេកនៅក្នុងផ្ទះជាមួយគ្នា។
ក្មេងប្រុសជាប្អូនបានស្លាប់ភ្លាមៗនៅក្នុងផ្ទះ ហើយក្មេងស្រីជាបងត្រូវបានក្រុមគ្រួសារព្យាយាមដឹក មកសង្គ្រោះរហូតដល់រាជធានីភ្នំពេញ តែមិនអាចជួយសង្គ្រោះជីវិត និងបានស្លាប់បាត់បង់ជីវិតនៅលើរថយន្តវេលាម៉ោង ៨យប់ថ្ងៃដដែលនោះ។ កុមារារងគ្រោះមានឈ្មោះ ផា សុខលី អាយុ២ឆ្នាំ និងកុមារីជាបងមានឈ្មោះ ផា ស្រីល័ក្ខ អាយុ១០ឆ្នាំ ។
ប្រជាពលរដ្ឋគ្រប់មជ្ឈដ្ឋាន សុំឲ្យផ្តន្ទាទោសឲ្យបានធ្ងន់ធ្ងរបំផុត៕
