ខេត្តកំពង់ធំ ៖ ព្រៃសហគមន៍ជាំម្រេចដែលមានផ្ទៃដីគ្របដណ្តាប់ប្រមាណជាង២ពាន់ហិចតានៅក្នុងភូមិសាស្រ្តភូមិត្រឡែកចាស់ ឃុំសាលាវិស័យ ស្រុកប្រាសាទបល័ង្ក ខេត្តកំពង់ធំ ដែលស្ថិតនៅក្រោមការគ្រប់គ្រងរបស់លោក សោម សុភ័ក្រ ជាប្រធានសហគមន៍ជាំម្រេច និងលោក លី ស្រេង ប្រធានទីចាត់ការដែនជំរកសត្វព្រៃបឹងពែរ ជាអ្នកទទួលខុសត្រូវមើសថែទាំព្រៃឈើ និងដីសហគមន៍ ចៀសវាងពីការទន្ទ្រានពីប្រជាពលរដ្ឋ។ តែផ្ទុយទៅវិញបុគ្គលទាំងពីរនេះ បែជាមិនយកចិត្តទុកដាក់ការពារនោះទេ គឺធ្វើជាព្រងើយកំពុងបើកដៃឲ្យប្រជាពលរដ្ឋធ្វើការកាប់ទន្ទ្រានដោយរណាយន្តទៅវិញ។
បច្ចុប្បន្នព្រៃសហគមន៍នេះ បើតាមការប៉ាន់ប្រមាណនៅមិនដល់៣០០ ហិចតាផងហើយក៏កំពុងធ្វើការទន្ទ្រានដោយរូបភាពធ្វើចំការ និងកាប់អុសម៉ែត្រពីប្រជាពលរដ្ឋទៅវិញ។ បើតាមការបញ្ជាក់របស់ប្រជាពលរដ្ឋកាប់អុសម៉ែត្រ នៅក្នុងព្រៃសហគមន៍ សុំមិនបញ្ចេញឈ្មោះបានបញ្ជាក់ថា ការចូលកាប់នៅទីនេះ គឺលោកបានធ្វើការបង់ប្រាក់ទៅឲ្យលោក សោម សុភ័ក្រ ក្នុងមួយគោយន្តចំនួនពីរម៉ឺនរៀល សម្រាប់ជាថ្នូរនូវការឲ្យចូលកាប់ និងមិនចាប់គោយន្ត នៅពេលចេញទៅវិញ។ រីឯប្រជាពលរដ្ឋម្នាក់ទៀត ដែលកំពុងអារផ្តួលរំលំដើមឈើ ក្នុងព្រៃសហគមន៍បានលើកឡើងដែរថា សកម្មភាពរបស់គាត់នៅពេលនេះ គឺជាការស៊ីឈ្នួល ម្ចាស់ដី ក្នុងតម្លៃមួយថ្ងៃពីរម៉ឺនរៀល ដែលម្ចាស់ដីបានជួលគាត់ និងប្រាប់ឲ្យផ្តួលរំលំ ដែលដីនេះគឺបានអះអាងថា បានធ្វើការទិញលក់ពីសហគមន៍រួចមកហើយ។
ជាមួយគ្នានេះដែរ អ្នកសារព័ត៌មានយើងបានធ្វើការហៅទូរស័ព្ទទៅកាន់លោក សោម សុភ័ក្រ ជាប្រធានសហគមន៍ជាំម្រេច លោកបានឆ្លើយថា រូបលោកបានឈប់ធ្វើជាប្រធានសហគមន៍នេះ ជាងមួយឆ្នាំមកហើយ ព្រោះការធ្វើជាប្រធានសហគមន៍នេះ មិនបានជាប្រយោជន៍អ្វី សម្រាប់រូបលោក ហើយនាំតែរឿងដាក់ខ្លួនឯង ពិបាកដោះស្រាយជាញឹកញាប់។ រីឯលោក លី ស្រេង ជាប្រធានដែនជំរកសត្វព្រៃបឹងពែរ និងមានតួនាទីជួយការពារព្រៃឈើដែរនោះបានលើកឡើងដែរថា រូបលោកបានធ្វើការប្រគល់នូវការគ្រប់គ្រងទៅឲ្យក្រុមប្រឹក្សាឃុំហើយ ដោយរូបលោកគ្រាន់តែ ជួយជាកម្លាំងអន្តរាគមន៍ក្នុងការបង្រា្កបបទល្មើសប៉ុណ្ណោះ។ បើទោះបីជាយ៉ាងនេះក្តីលោក ជិន ហ៊ីន ជាមេឃុំសាលាវិស័យ បានញ្ជាក់ដែរថា រូបលោកមិនស៊ីជម្រៅលើការគ្រប់គ្រងដីព្រៃនេះនោះទេ ព្រោះសិទ្ធិអំណាចនៃការគ្រប់គ្រងទាំងអស់គឺស្ថិតនៅលើការគ្រប់គ្រងរបស់លោកប្រធានសហគមន៍ និងលោក លី ស្រេង ដដែល។
គួរបញ្ជាក់ដែរថា បច្ចុប្បន្ននេះ ដីព្រៃដែលកំពុងកាប់ទន្ទ្រាន និងដុតជាបណ្តើរៗ ហើយនឹងរៀបចំដាំយកដីជាកម្មសិទ្ធិ។ ហើយមានដីមួយចំនួនត្រូវបានប្រជាពលរដ្ឋនៅក្នុងមូលដ្ឋានប្រាប់ថា លោក សោម សុភ័ក្រ និងលោក លី ស្រេង រៀបចំលក់ឲ្យឈ្មួញមានលុយជាបន្តបន្ទាប់ទៀតផងដែរ៕ ដោយ តេច ឆេង
