ខេត្តរតនគិរី ៖ ប្រជាពលរដ្នបានរាយការណ៏មកថា ឈ្មួញរកស៊ីឈើខុសច្បាប់ដុះស្លែឈ្មោះ នី កាចាញ បាននិងកំពុងនាំគ្រឿងចក្រនិងកៀងគរបក្ខពួក ចូលទៅក្នុងតំបន់ព្រៃសហគមន៍ពីរកន្លែងស្ថិតនៅក្នុងស្រុកអណ្ដូងមាស ខេត្តរតនគិរី ដើម្បីប្រមូលយកឈើ ដឹកជញ្ជូនទៅលក់ឲ្យឈ្មួញវៀតណាម។
កាលពីពេលកន្លងទៅ មេឈ្មួញជំនាញរកស៊ីឈើខុសច្បាប់ឈ្មោះ នី កាចាញ រូបនេះបានធ្វើសកម្មភាពដឹកជញ្ជូនឈើប្រណីតជាទ្រង់ទ្រាយធំ ចេញពីស្រុកអូរជុំ ឆ្លងកាត់ក្រុងបាលុង ឆ្ពោះទៅកាន់ច្រកទ្វារព្រំដែនអន្តរជាតិអូរយ៉ាដាវ ដោយដឹកតាមរថយន្តយីឌុបភ្លៅ៦ ប៉ុន្តែបច្ចុប្បន្ន ឈ្មួញរូបនេះ បានប្តូររូបភាពដឹកជញ្ជូនឈើប្រណីតដោយខុសច្បាប់តាមរថយន្តប្រភេទទេសចរណ៍វិញ ចូលទៅលក់ក្នុងទឹកដីវៀតណាមដោយរលូន តាមច្រកទ្វារព្រំដែនអន្តរជាតិអូរយ៉ាដាវ ដោយមានការឃុបឃិតពីសមត្ថកិច្ច និងអាជ្ញាធរខេត្តរតនគិរីដែលបានទទួលលាភសក្ការៈពីឈ្មោះ នី កាចាញ។
ប្រជាសហគមន៍ការពារព្រៃឈើ បានបញ្ជាក់យ៉ាងច្បាស់ថា សកម្មភាពកាប់ឈើដោយខុសច្បាប់នេះ គឺស្ថិតនៅក្បែរភូមិបាដល ឃុំញ៉ាង ស្រុកអណ្តូងមាស ខេត្តរតនគិរី ដោយប្រើរថយន្តបង្កុងដឹកឈើហុបមូល ទើបតែកាប់បានថ្មីៗស្រស់ៗ ពីដែនព្រៃឈើសហគមន៍។
ទាក់ទិននឹងការកាប់ឈើនៅព្រៃសហគមន៍ ក្នុងស្រុកអណ្តូងមាស ខេត្តរតនគិរី នេះទៀតសោត គឺលោក នី កាចាញ បានឱ្យបក្ខពួក ជាអ្នកផ្ដល់លុយរាប់ម៉ឺនដុល្លារ ទៅឲ្យប្រធានសហគមន៍ ដើម្បីបើកដៃឲ្យមេឈ្មួញឈើទុច្ចរិតទាំងនេះ អាចនាំគ្រឿងចក្រ និងកម្មករចូលទៅកាប់បំផ្លាញព្រៃឈើសហគមន៍ទាំងបំពានច្បាប់ រួចហើយដឹកចេញទៅកាន់ប្រទេសវៀតណាម។
មេឈ្មួញឈើ នី កាចាញ ធ្លាប់បានជួលកម្មករសំរុកលួចកាប់ឈើយ៉ាងកក្រើក នៅក្បែរភូមិភិ ឃុំសេសាន ស្រុកអូរយ៉ាដាវ រហូតដល់បង្គោល១៤ និង១៥ ក្នុងឃុំញ៉ាង ស្រុកអណ្តូងមាស ដោយអូសឈើហុបមូលតាមរថយន្តកែច្នៃ ចូលក្នុងទឹកទន្លេសេសាន រួចបណ្តែតជាក្បូន ឆ្លងដែនចូលទៅក្នុងទឹកដីវៀតណាម ដូចហែកអង្គកឋិនទាន ប៉ុន្តែគ្មានមន្ត្រី និងសមត្ថកិច្ចណាហ៊ានក្អកនិងយកភ្នែកមើលជាមួយមេឈ្មួញរូបនេះឡើយកុំថាឡើយរហូតដល់បង្រ្កាបនោះ។
ដោយសារអាជ្ញាធរ និងសមត្ថកិច្ចពាក់ព័ន្ធ មិនមានវិធានការផ្លូវច្បាប់ឲ្យបានតឹងរ៉ឹង ចំពោះសកម្មភាពកាប់បំផ្លាញ និងដឹកជញ្ជូនផល អនុផលព្រៃឈើនៅក្នុងខេត្តរតនគិរីនេះហើយ ទើបក្រុមឈ្មួញឈើទុច្ចរិត នាំមុខដោយឈ្មោះ នី កាចាញ នៅតែបន្តសកម្មភាពកាប់បំផ្លាញព្រៃឈើក្នុងដែនសហគមន៍ មានទីតាំងស្ថិតនៅក្នុងស្រុកអណ្ដូងមាស រួចដឹកជញ្ជូនឈើហ៊ុបមូលទាំងនេះ ឆ្លងដែនទៅលក់ក្នុងទឹកដីវៀតណាមដូចភ្លៀងរលឹម ដោយមិនញញើតច្បាប់រដ្ឋនិងអនុសាសន៏សម្តេចតេជោនាយករដ្ឋមន្រ្តីឡើយ ខណៈលោកអភិបាលខេត្តរងការរិះគន់ថា គ្មានវិធានការបង្រ្កាប។
អង្គភាពយើង ពុំអាចទាក់ទងសុំការបំភ្លឺបានឡើយ តែស្វាគមន៏រាល់ការពន្យល់ពីគ្រប់ភាគីពាក់ពន្ធ័៕
