រាជធានីភ្នំពេញ ៖ កាលពីព្រឹកថ្ងៃទី៣០ ខែឧសភា ឆ្នាំ២០១៩ លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យ ក្រសួងព័ត៌មាន បានឲ្យដឹងថា នៅក្នុងជំនួបពិភាក្សាការងាររវាង លោក ខៀវ កាញារីទ្ធ រដ្ឋមន្ត្រី ក្រសួងព័ត៌មាន និង លោក Michael Newbill ភារៈធារីស្ថានទូតអាមេរិកប្រចាំនៅកម្ពុជា និងលោក Matthew Walsh អនុប្រធាន ទទួលបន្ទុកប្រតិបត្តិការនៃ ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកល (US Agency for Global Media) នៅទីស្តីការក្រសួងព័ត៌មាន ។
ក្រសួងព័ត៌មាន បានឯកភាពជាគោលការណ៍ក្នុងការផ្ដល់ពាក្យស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិក (VOA)ផ្សាយជាខេមរភាសាប្រចាំនៅកម្ពុជា ជូនទីភ្នាក់ងារសហរដ្ឋអាមេរិកសម្រាប់ប្រពន្ធ័ផ្សព្វផ្សាយសាកល (US Agency for Global Media) ដើម្បីបំពេញបែបបទដាក់ឱ្យមកក្រសួងព័ត៌មានវិញ មុននឹងឈានទៅបើកការិយាល័យតំណាង VOA ប្រចាំនៅកម្ពុជាឡើងវិញ ។
លោក មាស សុភ័ណ្ឌ បានបញ្ជាក់ថា លោក Matthew Walsh អនុប្រធានទទួលបន្ទុកប្រតិបត្តិការនៃទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកលបានស្នើសុំឱ្យក្រសួងព័ត៌មានបញ្ជាក់ពីនីតិវិធីក្នុងការបំពេញបែបបទក្នុងការបើកការិយាល័យវិទ្យុVOAនៅកម្ពុជាឡើងវិញ។ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានឆ្លើយតបឯកភាពជាគោលការណ៍ឱ្យ Global Media អាចបើកការិយាល័យតំណាងវិទ្យុ VOA នៅកម្ពុជាបាន ។
លោក Matthew Walsh អនុប្រធានទទួលបន្ទុកប្រតិបត្តិការនៃទីភ្នាក់ងារសហរដ្ឋអាមេរិកសម្រាប់ប្រពន្ធ័ផ្សព្វផ្សាយសកល(US Agency for Global Media)បានអរគុណចំពោះក្រសួងព័ត៌មានដែលបានជួយសម្របសម្រួលឱ្យមានការឯកភាពគ្នាជាគោលការណ៍ក្នុងការបើកការិយាល័យ VOA ខេមរភាសាប្រចាំនៅកម្ពុជា ។ លោកបានបន្ដទៀតថា Global Media នឹងដាក់លិខិតស្នើសុំមកកាន់ក្រសួងវិញ នៅពេលឆាប់ៗនេះ៕
