ខេត្តព្រះសីហនុ ៖ នៅសាលាខេត្តព្រះសីហនុ នាព្រឹកថ្ងៃទី២៨ ខែឧសភា ២០១៩ អភិបាលខេត្តព្រះសីហនុ និងជាអនុប្រធានគណកម្មការសុវត្ថិភាពចរាចរណ៍ផ្លូវគោកថ្នាក់ខេត្ត បាន ស្នើអ្នកបើកបរទាំងអស់គោរពច្បាប់និងយោគយល់គ្នាពេលបើកបរដើម្បីកាត់បន្ថយការកកស្ទះនិងចៀសវាងគ្រោះថ្នាក់ចរាចរណ៍ជាយថាហេតុក្នុងទិវាសប្តាហ៍ជាតិសុវត្ថិភាពចរាចរណ៍ផ្លវគោកលើកទី១២ ។
ឯកឧត្តម យន្ត មីន និយាយថា បញ្ហាការកកស្ទះនេះ អាជ្ញាធរសមត្ថកិច្ចកំពុងគិតគូរដោះស្រាយចំពោះមុខ ដោយតំរូវអោយ ១.ធ្វើផ្លូវឯកទិស ២.បន្តសកម្មភាព អប់រំផ្សព្វផ្សាយអោយបានទូលំទូលាយបន្ថែមទៀត
៣.វិធានការណ៍ផាកពិន័យ ឬអនុវត្តវិធានការណ៍ច្បាប់អោយបានតឹងរឹងបំផុត។
តាមរយៈទិវានេះ ឯកឧត្តម យន្ត មីន មានរំពឹងថាអ្នកចូលរួមថ្ងៃនេះនឹងយកខ្លឹមសារនេះទៅអប់រំផ្សព្វផ្សាយបន្តដល់ពលរដ្ឋបន្ថែមទៀតដើម្បីជម្រុញពួកគេអោយមានការចូលរួមទាំងអស់គ្នា ទើបអាចដោះស្រាយបញ្ហាកកស្ទះចរាចរណ៍និងចៀសវាងការកើតគ្រោះថ្នាក់ចរាចរណ៍ជាយថាហេតុ។
យោងតាមការលើកឡើងក្នុងទិវានេះបង្ហាញថា បញ្ហាគ្រោះថ្នាក់ចរាចរណ៍ គឺជាបញ្ហាប្រឈមគួរអោយព្រួយបារម្ភណ៍គ្រាដែលប្រទេសជាតិមានការអភិវឌ្ឍលើគ្រប់វិស័យ ជីវភាពពលរដ្ឋមានភាពធូរធារក្រោមដំបូលសន្តិភាពក្នុងការដឹកនាំរបស់រាជរដ្ឋាភិបាលកម្ពុជា មានសម្តេចតេជោសែន ជាប្រមុខដឹកនាំ។ ទន្ទឹមនេះនៅខេត្តព្រះសីហនុ ការកកស្ទះចរាចរណ៍តាមដងផ្លូវនិងគ្រោះថ្នាក់ចរាចរណ៍ ក៏កំពុងកើតមានគួរកត់សំគាល់ផងដែរស្របពេលដែលខេត្តនេះកំពុងមានកំណើនអភិវឌ្ឍន៍ នាំអោយមាន កំណើនយានយន្ត និងកំណើនមនុស្ស។
គួរបញ្ជាក់ថា សំរាប់ខេត្តព្រះសីហនុ ក្នុងត្រីមាសទី១ឆ្នាំ២០១៩នេះ មានគ្រោះថ្នាក់ចរាចរណ៍បានកើតឡើងចំនួន ៦៧ ករណី ស្លាប់៤៥នាក់ របួស១១៩នាក់ បើធៀបឆ្នាំ២០១៨ បានកើនឡើង៦៦នាក់ ក្នុងនោះអ្នកស្លាប់បានកើន១៧នាក់ អ្នករបួសកើន៦៦នាក់។នេះយោងតាមរបាយការណ៍នគរបាលចរាចរណ៍ខេត្តព្រះសីហនុ៕
