រាជធានីភ្នំពេញ ៖ ប្រភពមន្ត្រីគយមួយចំនួននៅច្រកអាកាសយានដ្ឋានអន្តរជាតិភ្នំពេញ បានបង្ហើបឲ្យដឹងថា លោក លឹម សម្បត្តិ បន្តយកវិធីរបស់លោក លាង ហៃ មកប្រើដើម្បីប្រមូលលុយតាមរបៀបពុករលួយដោយគ្មានញញើតអ្វីទាំងអស់។
ប្រភពខាងលើបានឲ្យដឹងថា លោក លឹម សម្បត្តិ ចូលកាន់តំណែងជាប្រធានការិយាល័យគយប្រចាំច្រកនេះជំនួសលោក លាង ហៃ មិនបានប៉ុន្មានដង្ហើមចង្រិតផង ក៏ចាប់ផ្ដើមសាងភាពល្បីល្បាញខាងពុករលួយមិនចាញ់លោក លាង ហៃ នោះទេ ។តាមប្រភពពីក្រុមអ្នករត់ការឯកសារនាំចូលទំនិញតាមច្រកអាកាសយានដ្ឋានអន្តរជាតិភ្នំពេញ បានឲ្យដឹងថា លោក លឹម សម្បត្តិ កំពុងរៀបចំបណ្ដាញប្រព្រឹត្តអំពើពុករលួយជាប្រព័ន្ធ ដោយតម្រូវឲ្យមានការបង់លុយសម្រាប់ឯកសារប្រតិវេទន៍គយ ក្នុងមួយឯកសារចាប់ពី៣៥ដុល្លាររហូតដល់៧៥ដុល្លារ។ ប្រភពបានឲ្យដឹងទៀតថា ការបង់លុយពី៣៥ទៅ៧៥ដុល្លារ គឺសម្រាប់ឯកសារដែលគ្មានកំហុស។ ចំណែកឯកសារដែលមានកំហុសតិចតួចត្រូវក្រុមមន្ត្រីគយក្រោមការគ្រប់គ្រងរបស់លោក លឹម សម្បត្តិ គាបយកលុយពីអ្នករត់ការឯកសារនាំចូលទំនិញយ៉ាងពេញបន្ទុកតែម្តង។
បើតាមការអះអាងពីអ្នករត់ការឯកសារនាំចូលទំនិញផ្សេងៗក៏ដូចជាអ្នករត់ការនាំចូលទំនិញវិនិយោគបានឲ្យដឹងថា សម្រាប់ទំនិញវិនិយោគនាំចូលតាមច្រកអាកាសយានដ្ឋានអន្តរជាតិភ្នំពេញ ត្រូវបង់លុយប្រមាណ៧៥ដុល្លារជាកំហិត។ ក្នុងនោះទី១-ត្រូវបង់លុយ៥ដុល្លារសម្រាប់មន្ត្រីគយទទួលផែនចុះលេខ ទី២-បង់លុយចំនួន២០ដុល្លារសម្រាប់គណនេយ្យ ទី៣-ត្រូវបង់លុយ១០ដុល្លារសម្រាប់ប្រធានផ្នែកត្រួតពិនិត្យនិង១០ដុល្លារទៀតផ្នែកកូនចៅមន្ត្រីគយខាងត្រួតពិនិត្យ។ ទី៤-ត្រូវបង់លុយ២០ដុល្លារសម្រាប់មន្ត្រីគយផ្នែកកាត់ស្តុក បញ្ចុះឯកសារ និងទី៥-ត្រូវបង់ឲ្យអនុប្រធានការិយាល័យចំនួន៥ដុល្លារ ជាកិច្ចបញ្ចប់ដោយមិនអាចតវ៉ាបានឡើយ។ ប្រភពបានឲ្យដឹងទៀតថា សូម្បីតែទំនិញនាំចេញក៏ត្រូវបង់លុយឲ្យក្នុងមួយឯកសារ៣៥ដុល្លារយ៉ាងរលូនផងដែរ។ ដូច្នេះលោកលឹម សម្បត្តិ បានបន្តអនុវត្តតាមអំពើពុករលួយរបស់មេគយច្រកចាស់យ៉ាងម៉ឹងម៉ាត់ និងពុំមានការកែរទម្រង់សូម្បីបន្តិចឡើយ ហើយលោកលឹមសម្បត្តិនិងបក្ខពួកអាចប្រមូលលុយតាមរបៀបពុករលួយបានយ៉ាងច្រើន។ ព្រោះបច្ចុប្បន្នលោក លឹម សម្បត្តិ កំពុងប្រើតួនាទីនិងអំណាចប្រព្រឹត្តអំពើពុករលួយយ៉ាងងងើល ។ និយាយជារួមលោកលឹមសម្បត្តិកំពុងអនុវត្តន៍តាមរូបមន្តពុករលួយរបស់លោក លាង ហៃ យ៉ាងខ្ជាប់ខ្ជួន គឺខំប្រឹងប្រមូលលុយតាមច្រើនរូបភាពដោយមិនខ្វល់ពីការរិះគន់អ្វីទាំងអស់។
ដូច្នេះហើយទើបមានការអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកគយ ពិនិត្យមើលរឿងអាស្រូវពុករលួយរបស់លោក លឹម សម្បត្តិ ប្រធានការិយាល័យគយច្រកអាកាសយានដ្ឋានអន្តរជាតិភ្នំពេញជាបន្ទាន់។ ទន្ទឹមនឹងនេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរបើកការស៊ើបអង្កេតឲ្យបានស៊ីជម្រៅទៅលើរឿងអាស្រូវពុករលួយរបស់លោក លឹម សម្បត្តិ ប្រធានការិយាល័យគយច្រកអាកាសយានដ្ឋានអន្តរជាតិភ្នំពេញផងដែរ។
អង្គភាពយើងពុំអាចទាក់ទងលោក លឹម សម្បត្តិ ប្រធានការិយាល័យគយច្រកអាកាសយានដ្ឋានអន្តរជាតិភ្នំពេញសុំការបំភ្លឺបានឡើយ តែស្វាគមន៏រាល់ការពន្យល់ពីគ្រប់ភាគីពាក់ពន្ធ័៕
