រាជធានីភ្នំពេញ ៖ ស្ថានទូតចិនប្រចាំនៅកម្ពុជា បានចេញសេចក្តីជូនដំណឹងមួយ បង្ហាញអំពីស្ថានភាពនៃការស៊ើបអង្កេតលើវីដេអូជនជាតិចិន សង្ស័យពាក់ព័ន្ធនឹងសង្គមងងឹត ដែលត្រូវបានផ្សព្វផ្សាយលើប្រព័ន្ធអ៊ីនធើណេតនៅយប់ថ្ងៃទី១៧ ខែឧសភា ឆ្នាំ២០១៩ ។
ស្ថានទូតចិនបានអះអាងថា «ក្រោយការស៊ើបអង្កេតយ៉ាងម៉ត់ចត់ របស់សមត្ថកិច្ចចិន រកឃើញថា វីដេអូនេះត្រូវបានថតដោយជនជាតិចិន មកពីទីក្រុង Chongqing ដែលបានមកធ្វើការនៅប្រទេសកម្ពុជា កាលពីខែមីនាឆ្នាំនេះ ហើយក្រោយពីស្រវឹងស្រារួច ពួកគេបានថតវីដេអូមិនល្អបែបនេះ ដោយគ្រាន់ជាការលេងសើចប៉ុណ្ណោះ។ បុគ្គលទាំងឡាយនៅក្នុងវីដេអូនេះ មិនមានជាប់ពាក់ព័ន្ធនឹងសង្គមងងឹតណាមួយទេ»។
ស្ថានទូតចិនបានបញ្ជាក់បន្ថែមថា «ឆ្នាំនេះគឺជាឆ្នាំសហប្រតិបត្តិការអនុវត្តច្បាប់រវាងចិន និងកម្ពុជា ភាគីទាំងពីរនឹងចាត់វិធានការណ៍ជាក់ស្ដែងធ្វើឲ្យកាន់តែស៊ីជម្រៅលើកិច្ចសហការផ្នែកសន្តិសុខ និងការអនុវត្តច្បាប់ដែលនឹងនាំមកនូវភាពសុខដុមរមនា និងអត្ថប្រយោជន៍ជូនដល់ប្រជាជនប្រទេសទាំងពីរ»។
ការស៊ើបអង្កេតនេះបានធ្វើឡើង បន្ទាប់ពីប្រព័ន្ធអ៊ីនធើណេតនាពេលថ្មីៗនេះ បានបញ្ចេញនូវវីដេអូខ្លីមួយសង្ស័យពាក់ព័ន្ធនឹងសកម្មភាពជនសង្គមងងឹត ដែលថតដោយបុរសជនជាតិចិនជាង១០នាក់ ដោយហៅខ្លួនឯងថា មកពីទីក្រុង Chongqing ប្រទេសចិនហើយ និយាយក្អេងក្អាងថា នឹងបំពុលដល់សន្តិសុខរបស់ខេត្តព្រះសីហនុ។
សូមជម្រាបថា កាលពីពេលថ្មីកន្លងទៅក្រុមជនជាតិចិនប្រមាណជាង១០នាក់ បានបង្ហោះវិដេអូឃ្លីបដែលមានរយៈពេល៩វិនាទី ដោយក្នុងនោះគេឃើញបុរសពាក់អាវយឺតសបានប្រកាសខ្លាំងថា កំពង់សោមមានស្ថិរភាព ឬអត់ ស៊ីសងលើក្រុមគេក្នុងរយៈពេល៣ឆ្នាំទៀត។ ជាការឆ្លើយតប នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានបញ្ជាឲ្យសមត្ថកិច្ចជំនាញដែលពាក់ព័ន្ធ ធ្វើការស្រាវជ្រាវភ្លាមៗ ដើម្បីរកក្រុមសង្គមងងឹតចិនមួយក្រុមនោះ៕
