រាជធានីភ្នំពេញ ៖ គ.ជ.ប បានប្រកាសថា ការឃោសនាបោះឆ្នោតក្រុមប្រឹក្សារាជធានី-ខេត្ត-ក្រុង-ស្រុក-ខ័ណ្ឌ អាណត្តិទី៣ ឆ្នាំ២០១៩នេះ នឹងចាប់ផ្ដើមពីថ្ងៃទី១៧ឧសភាស្អែកនេះ ខណៈដែលគណបក្សភាគច្រើននឹងមិនហែក្បួរឃោសនាដូចការបោះឆ្នោតទូទៅនោះទេ ។ ចំណែករយៈពេលនៃការឃោសនាបោះឆ្នោតគឺមានតែ៨ថ្ងៃប៉ុណ្ណោះ ។
អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា បានថ្លែងថា គណបក្សនយោបាយដែលចូលរួមការបោះឆ្នោត សុទ្ធតែបានត្រៀមខ្លួនធ្វើការឃោសនានៅទីតាំងរបស់ខ្លួន រួចរាល់ហើយដែរ ដោយបានជូនដំណឹងទៅកាន់គណៈកម្មការរាជធានី ខេត្ត រៀបចំការបោះឆ្នោតតាមនិតិវិធី ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានបញ្ជាក់ប្រាប់អ្នកសារព័ត៌មានថា ការមិនឃោសនាទ្រង់ទ្រាយធំព្រោះគេដឹងច្បាស់ហើយថា អង្គបោះឆ្នោតគឺជាសមាជិកក្រុមប្រឹក្សាឃុំ សង្កាត់របស់គណបក្សដែលជាប់ឆ្នោត ។ ចំណែកលោក ពេជ្រ ស្រស់ ប្រធានគណបក្សយុវជនកម្ពុជាដែលមានអង្គបោះឆ្នោតតែចំនួន៣នាក់ក៏មិនធ្វើការឃោសនាហែក្បួនឡើយ ។
គួរម្លឹកថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ដែលនឹងធ្វើឡើងនាថ្ងៃទី២៦ឧសភា ឆ្នាំ២០១៩និងមានគណបក្សនយោបាយចូលរួមចំនួន៧រួមមាន គណបក្សប្រជាជនកម្ពុជា គណបក្សសញ្ជាតិកម្ពុជា ហ្វ៊ុនស៊ិនប៉ិច ខែ្មររួបរួមជាតិ យុវជនកម្ពុជា គណបក្សឆន្ទៈខ្មែរ និង គណបក្សខ្មែរសាធារណៈរដ្ឋ៕