រាជធានីភ្នំពេញ ៖ ស្ថានទូតសាធារណរដ្ឋប្រជាមានិតចិនប្រចាំកម្ពុជា កាលពីថ្ងៃម្សិលមិញនេះ បានបង្ហោះសារនៅលើបណ្តាញសង្គមរបស់ខ្លួន ដោយបង្ហាញការយកចិត្តទុកដាក់ខ្ពស់ ចំពោះវីដេអូជនជាតិចិនសង្ស័យពាក់ព័ន្ធនឹងសង្គមងងឹតម៉ាហ្វីយ៉ា ដែលត្រូវបានផ្សព្វផ្សាយតាមបណ្ដាញសង្គម។
ស្ថានទូតចិនបានសរសេរថា ក្នុងពេលថ្មីៗនេះ បុរសជាងដប់នាក់ដែលហៅខ្លួនឯងជាជនជាតិចិនមកពីទីក្រុងchongqing បានបង្ហោះវីដេអូខ្លីមួយ ពាក់ព័ន្ធនឹងសកម្មភាពសង្គមងងឹត និយាយយ៉ាងក្អេងក្អាងថានឹងបំពុលដល់សន្តិសុខនៅខេត្តព្រះសីហនុ។
ស្ថានទូតចិនប្រចាំកម្ពុជាមានការយកចិត្តទុកដាក់ខ្ពស់ចំពោះបញ្ហានេះ និងបានជួយសម្របសម្រួលដល់សមត្ថកិច្ចនៃប្រទេសចិន និងកម្ពុជា ដើម្បីបើកការស៊ើបអង្កេតអោយបានគ្រប់ជ្រុងជ្រោយលើបញ្ហាមួយនេះ។
ជាមួយគ្នានេះដែរ កាលពីព្រឹកថ្ងៃទី១២ ខែឧសភា ឆ្នាំ២០១៩ នាយឧត្តមសេនីយ៍ នេត សាវឿន អគ្គស្នងការនគរបាលជាតិ ក៏បានបញ្ជាដាច់ខាតឲ្យសមត្ថកិច្ចកម្ពុជាតាមចាប់ខ្លួនបុរសជនជាតិចិនមួយក្រុមដែលបានប្រកាសថានឹងបង្កភាពអសន្តិសុខនៅក្នុងខេត្តព្រះសីហនុ។
គួរបញ្ជាក់ថា កាលពីពេលថ្មីៗនេះ មានវីដេអូឃ្លីបមួយរបស់បុរសចិនមួយក្រុមដែលទំនងស្ថិតនៅក្នុងកន្លែងស្នាក់នៅរបស់ពួកគេនៅក្នុងខេត្តព្រះសីហនុ ត្រូវបានចែកចាយនៅលើបណ្តាញសង្គម ដោយថា ដោយពួកគេបានស្រែក និងលើកដៃប្តេជ្ញា ហើយត្រូវបានបកប្រែជាភាសាខ្មែរក្រៅផ្លូវការថាពួកគេមកពីខេត្តឆុងឆីងប្រទេសចិន ពួកគេនឹងបង្កអសន្តិសុខនៅក្នុងខេត្តព្រះសីហនុ។
អ្វីដែលជាការចាប់អារម្មណ៍នៃសម្តីលើកឡើងនោះ គឺបុរសជនជាតិចិនពាក់ អាវយឺតពណ៌សដែលទំនងជាមេដឹកនាំ នៃក្រុមនេះបានស្រែកខ្លាំងៗថាកំពង់សោម៣ឆ្នាំក្រោយចង់ ឲ្យវឹកវរគឺវឹកវរចង់ឲ្យសុវត្ថិភាព គឺសុវត្ថិភាព ! ៕
