អន្តរជាតិ ៖ មេដឹកនាំកំពូលរបស់ក្រុមភេរវករ ISIS ឈ្មោះ អាប៊ូ បាកឺ អាល់បាដាឌី (Abu Bakr al-Baghdadi) បានលេចមុខជាលើកដំបូងក្នុងរយៈពេល៥ ឆ្នាំនៅក្នុងវីដេអូដែលបានចេញផ្សាយដោយក្រុមឃោសនាក្រុមជ្រុលនិយមកាលពីថ្ងៃចន្ទ ដោយទទួលស្គាល់ការបរាជ័យនៅក្នុងតំបន់រឹងមាំចុងក្រោយរបស់ក្រុមនេះនៅក្នុងប្រទេសស៊ីរី ប៉ុន្តែបានប្តេជ្ញាថានឹងមាន “សមរភូមិដ៏វែង” នៅខាងមុខ។ នេះបើតាមទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃអង្គារ ទី៣០ ខែមេសា ឆ្នាំ២០១៩។
ក្រៅពីនេះក៏មានការនិយាយពាក់ព័ន្ធការទទួលបរាជ័យមួយចំនួនទៀតរបស់ ISIS ផងដែរ រួមមានទាំងនៅទីក្រុងម៉ូស៊ូល (Mosul) របស់អ៊ីរ៉ាក់ និងក្រុង Sirte នៅលីប៊ី ប៉ុន្តែបុគ្គល អាល់បាដាឌី បានសន្យាថា ISIS នឹងមិនចុះចាញ់ដាច់ខាត ហើយនឹងបន្តធ្វើការសងសឹកសម្រាប់សមាជិករបស់ខ្លួន ដែលបានបាត់បង់ជីវិត។
ម្យ៉ាងវិញទៀត មេ ISIS រូបនេះ ក៏បានហៅករណីវាយប្រហារនៅប្រទេសស្រីលង្កា កាលពីថ្ងៃទី២១ ខែមេសានេះ ដែលបានផ្តាច់ជីវិតមនុស្ស ប្រមាណ២៥៣នាក់ និងបង្កឲ្យរបួសជាង៥០០នាក់ ជាសកម្មភាពសងសឹកមួយសម្រាប់ភាពបរាជ័យរបស់ ISIS ថែមទៀតផង។
បុគ្គល អាល់បាដាឌី ត្រូវបានគេឃើញជាលើកចុងក្រោយបំផុត នៅឯទីក្រុង Mosul កាលពីឆ្នាំ២០១៤ ក្នុងឱកាសនៃការប្រកាសបង្កើតរដ្ឋ ISIS ដែលកាលនោះលាតសន្ធឹងនៅលើតំបន់ភាគច្រើននៃប្រទេសអ៊ីរ៉ាក់និងស៊ីរី។បច្ចុប្បន្នអាមេរិកបានប្រកាសផ្តល់ទឹកប្រាក់២៥លានដុល្លា ដល់ជនណាដែលអាចសម្លាប់មេភេរវករអន្តជាតិនេះបាន៕
