ខេត្តកោះកុង ៖ តាមសេចក្តីរាយការណ៍ពីប្រជាពលរដ្ឋរស់នៅឃុំជ្រោយស្វាយ ស្រុកស្រែអំបិល ខេត្តកោះកុងថា មានសកម្មភាពចាក់ដីលុបឆ្នេរសមុទ្រមួយកន្លែងពីក្រុមមន្ត្រីយោធាជើងទឹកម្នាក់ថ្នាក់ផ្កាយ៣ ដោយបានធ្វើឡើងក្នុងរយះប៉ុន្មានថ្ងៃកន្លងទៅនេះ ស្ថិតនៅចំណុច ពយជិនទុង ស្ថិតក្នុងភូមិជ្រោយស្វាយលិច ឃុំជ្រោយស្វាយ ស្រុកស្រែអំបិល ខេត្តកោះកុង ។
ប្រភពថា ដីនេះមានទំហំប្រមាណជាង១០ហិចតាដែលចាក់ចូលតាមបណ្តោយឆ្នេរក្នុងសមុទ្រជិត២គីឡូម៉ែត្រ។
ឈ្មួញដែលធ្វើសកម្មភាពចាក់ដីលុបឆ្នេរនោះ ត្រូវប្រជាពលរដ្ឋបញ្ជាក់ថា មានឈ្មោះ ហួរ ហាប់ មានតួនាទីជាមន្ត្រីយោធាជាន់ខ្ពស់ខាងជើងទឹកកាន់តំបន់សមុទ្រ ថ្នាក់ឧត្តមសេនិយ៍ឯកទៀតផង។
ប្រជាពលរដ្ឋថា តាមធម្មតាកន្លងមក តំបន់នោះគឺជាទីកន្លែងប្រជាពលរដ្ឋចេញចូលរកស៊ីប្រចាំថ្ងៃ តែឥឡូវវាបានក្លាយជាទីតាំងត្រូវគេហាមមិនឲ្យប្រជាពលរដ្ឋឆ្លងកាត់ទៅវិញ និងហាមប្រជាពលរដ្ឋមិនឲ្យថតយករូបភាពជាដាច់ខាត។ បើអ្នកណាហ៊ានថតឲ្យគេដឹង គេនិងចាប់ដកយកម៉ាស៊ីនថត រឺទូរស័ព្ទដៃ។ ជាមួយគ្នានេះ ទីតាំងនោះថែមទាំងមានការដាក់បារ៉ាស់មិនឲ្យចេញចូលហើយមានអ្នកយាមប្រមាណ២០នាក់ដើរមើលគ្រប់ទីកន្លែងក្នុងបរិវេណនោះ។ ប្រជាពលរដ្ឋចំណាស់ៗនៅទីនោះ គាត់បាននិយាយថា ទីកន្លែដែលលោក ហ៊ួ ហាប់ ចាក់ដីរំលោភយកនោះ ជាទីកន្លែងពួកគាត់ទៅរកនេសាទដោយដៃ រកខ្យង ក្ដាម អូសត្រី ហើយដើរតាមឆ្នេរ ឆ្លងកាត់ពីភូមិ១ទៅភូមិ១ទៀត ហើយដីខ្សាច់ឆ្នេរនៅទីនេះល្អណាស់ នេះជាសម្ដីច្បាស់ការរបស់ប្រជាពលរដ្ឋនៅឃុំជ្រោយស្វាយ។
ចំណែកមេឃុំជ្រោយស្វាយឈ្មោះ ប៊ុន រ៉េ គាត់និយាយ ប្រាប់អ្នកសារព័ត៌មានថា រឿងលោក ហ៊ួ ហាប់ ចាក់ដីនេះ គាត់ថាគេចាក់ដីនេះតាំងពីគាត់មិនទាន់បានធ្វើមេឃុំ ដល់គាត់ធ្វើមេឃុំ លោក ហ៊ួ ហាប់ ចាក់បន្ថែមបន្តិចបន្តួចទេ រឿងហ្នឹង។ មេឃុំបន្តថា ហ៊ួ ហាប់ ចាក់ដីលប់សមុទ្របន្តិចបន្តួចនេះ ទុកដាក់អូរបរ័សំរាប់ចេញល្បាត ហើយទប់រលកផង។ មេឃុំបន្តថា គេមានខ្សែខ្នងធំណាស់ គាត់មិនហ៊ានទេរឿងហ្នឹង ពីព្រោះលោក ហ៊ួ ហាប់ ធ្លាប់ជួយក្នុងឃុំជ្រោយស្វាយដែរ។ មេឃុំបន្តថា ឲ្យសួរទៅខាងស្រុកទៅរឿងហ្នឹង។
ចំណែកប្រធានភូមិបាលស្រុកស្រែអំបិល លោក ជា នាង ថា រឿងចាក់ដីនោះ គាត់បានរាយការណ៍ទៅប្រាប់ថ្នាក់លើដែរ តែស្ងាត់ឈឹង ។លោក ជា នាង បន្តថា រឿងចាក់ដីនោះមិនមានច្បាប់ទេ បើធ្វើច្បាប់ក៍គាត់មិនហ៊ានស៊ីញ៉េដែរ ពីព្រោះដីនេះជាដីសមុទ្ររបស់រដ្ឋ។
ពាក់ព័ន្ធនឹងការចាក់រំលោភយកដីឆ្នេរសមុទ្រ អ្នកសារព័ត៌មានបានទូរស័ព្ទទៅលោក ហ៊ួ ហាប់ លោកបានឆ្លើយថា រឿងនេះ សួរទៅខាងអាជ្ញាធរគេទៅ គេដឹងហើយ ហើយក៏បឹតទូរស័ព្ទទៅ។
ក្រុមប្រជាពលរដ្ឋបានលើកឡើងថា ករណីចាក់រំលោភយកសមុទ្រនេះ មិនមែនជារឿងធម្មតានោះទេ ដោយវាអាចមានការឃុបឃិតជាប្រព័ន្ធ ព្រោះបើគ្មានការឃុបឃិតទេ គេមិនអាចពទ្ធ័យកសមុទ្រដែលខុសទៅនឹងច្បាប់របស់រដ្ឋយ៉ាងដូច្នោះនោះឡើយ ដូច្នេះពួកគាត់សង្ឃឹមថា គណៈកម្មការឆ្នេរសមុទ្រកម្ពុជា ក៏ដូចជាក្រសួងរៀបចំដែនដី ជួយពិនិត្យមើល កុំឲ្យបាត់ដិសមុទ្ររដ្ឋ៕
