អន្តរជាតិ ៖ តាមសេចក្តីរាយការណ៍បានឲ្យដឹងថា នៅវេលាម៉ោង១៣និង៥០នាទី ម៉ោងនៅទីក្រុងប៉េកាំង ប្រទេសចិន ត្រូវនឹងម៉ោង១២ និង៥០នាទី ម៉ោងនៅរាជធានីភ្នំពេញ ប្រទេសកម្ពុជា សម្តេច ហ៊ុន សែន នាយករដ្ឋមន្ត្រី និងគណៈប្រតិភូជាន់ខ្ពស់ រាជរដ្ឋាភិបាលកម្ពុជា រួមទាំងសមាជិកសភាពាណិជ្ជកម្មកម្ពុជា អញ្ជើញធ្វើដំណើរទៅដល់ទីក្រុងប៉េកាំង ប្រទេសចិន ប្រកបដោយសុវត្តិភាពហើយ ដើម្បីចូលរួមវេទិកាខ្សែក្រវាត់ និងផ្លូវ លើកទី២ សម្រាប់កិច្ចសហប្រតិបត្តិការអន្តរជាតិ ។
ទន្ទឹមនិងនោះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា គឺជាថ្នាក់ដឹកនាំកំពូលលើកដំបូងគេរបស់កម្ពុជា ដែលទទួលបាននូវគោរម្យងារ «សាស្រ្តាចារ្យកិត្តិយសផ្នែកទំនាក់ទំនងអន្តរជាតិ» ពីសាកលវិទ្យាល័យប៉េកាំង ដែលជាសាកលវិទ្យាល័យដ៏ធំ និងចំណាស់ជាងគេនៅទីក្រុងប៉េកាំង សាធារណរដ្ឋប្រជាមានិតចិន។
ពិធីប្រគល់ និងទទួល នៅរសៀលថ្ងៃទី២៥ ខែមេសា ឆ្នាំ២០១៩នេះ នៅសាកលវិទ្យាល័យប៉េកាំង ពេលអញ្ជើញមកដល់របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ត្រូវបានការ ធ្វើគារវកិច្ច ស្វាគមន៍យ៉ាងស្និទ្ធស្នាល រាក់ទាក់បំផុត ពីថ្នាក់ដឹកនាំក្រសួងអប់រំចិន ក្រុមប្រឹក្សាភិបាល សាកលវិទ្យាធិការ នៃសាកលវិទ្យាល័យ រួមទាំងនិស្សិតកម្ពុជា-ចិន ដែលកំពុងសិក្សានៅក្នុងសាកលវិទ្យាល័យប៉េកាំងជាច្រើនរូប៕
