ភ្នំពេញ ៖ តាមប្រភពពត័មានបានឲ្យដឹងថា កម្លាំងកងរាជអាវុធហត្ថលើផ្ទៃប្រទេស បានចាប់ខ្លួនមន្ត្រីយោធាផ្កាយមួយម្នាក់ រួមទាំងស្ត្រីម្នាក់ទៀតដែលដើរតួជាជំទាវផ្កាយ៣របស់អនុរដ្ឋលេខាធិការក្រសួងមហាផ្ទៃ ករណីបោកប្រាស់ ប្រជាពលរដ្ឋចង់ចូលធ្វើទាហាននិងប៉ូលិស ប៉េអឹមនិងគ្រូបង្រៀន ដោយយកលុយក្នុងម្នាក់៦.៥០០ដុល្លារអាមេរិក តែក្រោយមកទើបពលរដ្ឋដឹងថា ជាជនឆបោក ។
ប្រភពពីសមត្ថកិច្ចបានឲ្យដឹងថា ការចាប់ខ្លួននេះបានធ្វើឡើងកាលពីថ្ងៃទី២១និងថ្ងៃទី២៣ ខែមេសា ឆ្នាំ២០១៩ ម្សិលមិញ ។ ជនសង្ស័យដែលចាប់ខ្លួនឈ្មោះ ឃួន សុវណ្ណ ឧត្តមសេនីយ៍ត្រី ចាប់ខ្លួនកាលពីថ្ងៃទី២១ ខែមេសា ឆ្នាំ២០១៩ និងស្ត្រីឈ្មោះប៉ុន ស៊ីណាត ចាប់ខ្លួននៅថ្ងៃទី២៣ ខែមេសា ឆ្នាំ២០១៩ នៅខេត្តកំពង់ឆ្នាំង។
សមត្ថកិច្ចបន្តថា ការចាប់ខ្លួននេះ គឺបន្ទាប់ពីប្រជាពលរដ្ឋបានឡើងមកដាក់ពាក្យបណ្តឹងទៅកងរាជអាវុធហត្ថផ្ទៃប្រទេស ដោយសូមប្តឹងឈ្មោះ ឃួន សុវណ្ណ មានមុខរបរជាអតីតមន្ត្រីយោធាពាក់ផ្កាយមួយ។
ប្រភពពត័មានចុងក្រោយ ជនសង្សយ័ទាំងពីរនាក់ ត្រូវបានបញ្ជូនទៅកាន់តុលាការយោធា ក្រោយកម្លាំងកងរាជអាវុធហត្ថលើផ្ទៃប្រទេស បានសាកសួរតាមនីតិវិធី៕
