ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានធ្វើការអំពាវនាវដល់ភាគីពាក់ព័ន្ធទាំងអស់ស្វែងរកចាប់ខ្លួនមេខ្លោងជួញដូរមនុស្សឲ្យបាន ខណៈជនរងគ្រោះករណីជួញដូរមនុស្ស និងអាជីវកម្មផ្លូវភេទនៅតែបន្តកើតមាននោះ។
ការអំពាវនាវរបស់សម្តេចក្រឡាហោម ស ខេង ធ្វើឡើងក្នុងឱកាសអញ្ជើញជាអធិបតីក្នុងកិច្ចប្រជុំផ្សព្វផ្សាយរបាយការណ៍ជាតិ ស្តីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០១៨ និងទិសដៅ២០១៩ នាព្រឹកថ្ងៃទី២៣ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ។
សម្តេចក្រឡាហោម ស ខេង បានលើកឡើងថា ករណីជួញដូរមនុស្សនេះនៅតែបន្តកើតមានបើទោះបីជាឆ្នាំ២០១៨ មានការធ្លាក់ចុះយ៉ាងណាក្តី ប៉ុន្តែរទោះជាយ៉ាងណាក៏ដោយត្រូវតែស្វែងរកចាប់ខ្លួនមេខ្លោងទាំងក្នុងប្រទេស និងក្រៅប្រទេសឲ្យបានទើបបញ្ហានេះមិនមានបន្តទៀត។
ជាមួយគ្នានោះដែរ សម្តេចក្រឡាហោម ក៏បានអំពាវនាវដល់ភាគីពាក់ព័ន្ធទាំងអស់បន្តសហការគ្នាទប់ស្កាត់ឲ្យបានចំពោះករណីជួញដូរមនុស្សនិងការកេងប្រវ័ញផ្លូវភេទគ្រប់រូបភាពទាំងអស់ដើម្បីឲ្យស្របទៅតាមគោលការណ៍របស់រាជរដ្ឋាភិបាលក្នុងឆន្ទៈទប់ស្កាត់ និងបង្ក្រាបការជួញដូរមនុស្សនេះ។
បើតាមការឲ្យដឹងពី លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ បានបញ្ជាក់ថា នាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិក្រសួងមហាផ្ទៃ កងរាជអាវុធហត្ថលើផ្ទៃប្រទេស និងស្នងការដ្ឋាននគរបាលរាជធានី-ខេត្ត តាមដានស្រាវជ្រាវបង្ក្រាបបទល្មើសអំពើជួញដូរមនុស្ស និងអំពើធ្វើអាជីវកម្មផ្លូវភេទ សរុបបាន ១៣៤លើ១៥៩ករណី បើប្រៀបធៀបនឹងឆ្នាំ២០១៧ មានការថយចុះចំនួន ២ករណី ស្មើនឹង ១៤,៧២%។
សរុបជនសង្ស័យ ដែលត្រូវបានឃាត់ខ្លួន និងបញ្ជូនទៅសាលាដំបូងចំនួន ២២៤លើ២០៣នាក់ ធៀបនឹងឆ្នាំ២០១៧កើនឡើងចំនួន២១នាក់ (ស្រី៩៨នាក់) ក្នុងនោះជនសង្ស័យជាអនីតិជន ១៧នាក់ និងជនបរទេសចំនួន៣១លើ២០នាក់ មាន៩សញ្ជាតិ គឺ៖ ចិន ១៥នាក់ អង់គ្លេស ០៦នាក់ វៀតណាម ០៣នាក់ កាណាដា ០២នាក់អូស្ត្រាលី ០១នាក់ ន័រវេស ០១នាក់ ហុល្លង់ ០១នាក់ នូវែលហ្សេឡង់ ០១នាក់ និងហ្វីលីពីន ០១នាក់។
ដោយឡែកសម្រាប់ក្នុងប្រតិបត្តិការបង្ក្រាប លោកជំទាវរដ្ឋលេខាធិការ បានបញ្ជាក់ថា សមត្ថកិច្ចបានសង្គ្រោះជនរងគ្រោះករណីជួញដូរមនុស្ស និងអាជីវកម្មផ្លូវភេទសរុបចំនួន ២៣០លើ៣៤៥នាក់ (ធៀបនឹងឆ្នាំ២០១៧ ថយចុះចំនួន១១៥នាក់) ក្នុងនោះមានអាយុក្រោម ១៥ឆ្នាំ ៩២នាក់ អាយុពី១៥ឆ្នាំ-១៧ឆ្នាំ ២៣នាក់ និងអាយុ១៨ឆ្នាំឡើង ១១៥នាក់ (បានបញ្ជូនទៅមន្ទីរសង្គមកិច្ចចំនួន៩២នាក់ ទៅអង្គការដៃគូ២នាក់ និងបញ្ជូនទៅគ្រួសារចំនួន១៣៦នាក់)។
បង្ក្រាបបាន ៣៩លើ៤៨ករណី (ប្រៀបធៀបនឹងឆ្នាំ២០១៧ ថយចុះចំនួន ៩ករណី) ឃាត់ខ្លួនសង្ស័យចំនួន ១០៥នាក់ (ស្រី ៧៨នាក់) ក្នុងនោះមានអនីតិជន ១នាក់ និងជនបរទេស ៥នាក់ សញ្ជាតិចិន សង្គ្រោះជនរងគ្រោះចំនួន ៦៤នាក់ អាយុក្រោម១៥ឆ្នាំ ៩នាក់ អាយុពី១៥-១៧ឆ្នាំ ១០នាក់ និងអាយុឆ្នាំ៤៥នាក់ (ប្រគល់ឲ្យមន្ទីរសង្គមកិច្ចចំនួន ២០នាក់ អង្គការដៃគូចំនួន២នាក់ និងទៅគ្រួសារចំនួន៤៕
( អត្ថបទអគ្គស្នងការនគរបាលជាតិ )
