ខេត្តព្រះស៊ីហនុ ៖ ស្នងការនគរបាលខេត្តព្រះសីហនុ លោក ជួន ណារិន្ទ បានឲ្យដឹងថា កម្លាំងនគរបាលរបស់លោក បានចាប់ខ្លូនមនុស្ស៦នាក់ ដែលបានដឹកនាំ និងចូលរួមប្រើហិង្សាទៅលើមន្រ្តីនគរបាល និងប្រជាការពារ ខណៈពេលកងកម្លាំងទាំងនោះ បានចុះទៅអន្ដរាគមន៍ ឲ្យពួកគេបើកផ្លូវជាតិលេខ៤ ដែលពលរដ្ឋទាំងនោះបានបិទ ឲ្យដំណើរការឡើងវិញ។
ព្រឹកមិញនេះ ប្រជាពលរដ្ឋដែលអាជ្ញាធររដ្ឋបាលខេត្តព្រះសីហនុអះអាងថា ជាជនអនាធិបតេយ្យ ចូលទៅសង់ផ្ទះ ឬខ្ទមតូចៗ នៅលើដីមានម្ចាស់កម្មសិទ្ធិទាំងនោះ បានយកដុំថ្ម និងមែកឈើទៅដាក់បិទផ្លូវជាតិលេខ៤ បង្កឲ្យកកស្ទះចរាចរណ៍ប្រហែល១ម៉ោង។
លោក ជួន ណារិន្ទ បន្តថា ការចាប់ខ្លួនមនុស្សទាំង៦នាក់បន្ថែមទៀតនេះ គឺធ្វើឡើងកាលពីព្រឹកថ្ងៃសុក្រ ទី១៩ ខែមេសា។ ហើយថា កាលពីថ្ងៃទី១៨ ខែមេសា ម្សិលមិញ សមត្ថកិច្ច ក៏បានឃាត់ខ្លួន២នាក់ដែរ ដែលសរុបមកដល់ថ្ងៃទី១៩ ខែមេសានេះ សមត្ថកិច្ច បានឃាត់ខ្លួនមនុស្សចំនួន៨នាក់ហើយ។
លោក ជួន ណារិន្ទ បញ្ជាក់ថា ទង្វើរបស់ប្រជាពលរដ្ឋទាំង ៨នាក់នោះ ជាបទល្មើសព្រហ្មទណ្ឌ ដែលមិនអាចលើកលែងឲ្យបាន និងត្រូវតែកសាងសំណុំរឿង ទៅកាន់តុលាការដើម្បីចាត់វិធានការតាមផ្លូវច្បាប់។
បញ្ហានេះ លោក យន្ត មីន អភិបាលខេត្តព្រះសីហនុ មានប្រសាសន៍ថា ចំពោះបញ្ហាដីធ្លី អាជ្ញាធរ និងមន្រ្តីជំនាញស្ថាប័នពាក់ព័ន្ធតែងមានយន្តការដោះស្រាយ តាមប្រព័ន្ធតុលាការ និងតាមគណៈកម្មាធិការដោះស្រាយទំនាស់ដីធ្លី។
លោកបន្តថា ប្រជាពលរដ្ឋ ដែលចូលទៅរស់នៅលើដីមានម្ចាស់កម្មសិទ្ធិទាំងនោះ ត្រូវបញ្ឈប់សកម្មភាពបិទផ្លូវ និងឈប់ប្រមូលផ្តុំគ្នាប្រើហិង្សាទៅលើសមត្ថកិច្ច តទៅទៀត ព្រោះជាទង្វើខុសច្បាប់ ហើយងាកមករកការតវ៉ាតាមផ្លូវច្បាប់ជំនួសវិញ។
គួរបញ្ជាក់ថា ការបិទផ្លួវជាតិលេខ៤ គឺឈានចូលដល់ថ្ងៃទី២ ក្រោយពីប្រជាពលរដ្ឋបានខឹងសម្បារ ចំពោះអាជ្ញាធរ ដែលចុះទៅរុះរើខ្ទម និងសំណង់អនាធិបតេយ្យខុសច្បាប់របស់ពួកគាត់ នៅឃុំបិតត្រាំង ដែលសង់លើដីមានម្ចាស់កម្មសិទ្ធិស្របច្បាប់ មានចំនួនជាង៦០០ខ្នង កាលពីថ្ងៃទី១៨ ខែមេសាម្សិលមិញ៕
