ភ្នំពេញ ៖ រដ្ឋមន្ត្រីក្រសួងទេសចរណ៍ បានថ្លែងដោយក្តីមោទនភាពថា ការចូលរួមកំសាន្តដ៏ច្រើនកុះកររបស់ប្រជាពលរដ្ឋកម្ពុជា នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំនេះ បានបញ្ជាក់កាន់តែច្បាស់ណាស់ថា ប្រជាពល រដ្ឋយើង ពេញចិត្តនឹងសភាពការណ៍ប្រទេសជាតិបច្ចុប្បន្ន ពេញចិត្តនិងគាំទ្រដាច់ខាតចំពោះការដឹកនាំដ៏ត្រឹមត្រូវ និងឈ្លាសវៃ របស់សម្តេចនាយករដ្ឋមន្ត្រី ហ៊ុន សែន ផង ហើយក៏បញ្ជាក់ថា ប្រជាពលរដ្ឋ ពិតជាត្រូវការសុខសន្តិភាពនិងការអភិវឌ្ឍន៏។
លោក ថោង ខុន រដ្ឋមន្ត្រីក្រសួងទេសចរណ៍ថ្លែងបញ្ជាក់ថា គ្រប់ទីកន្លែង មិនថា តាមរមណីយដ្ឋានទេសចរណ៍ មិនថា តាមវត្តអារាម សាលារៀន តាមភូមិ តាមផ្ទះសំបែង ។ល។ គឺគ្រប់គ្រួសារសុទ្ធតែបានចូលរួមយ៉ាងសប្បាយរីករាយក្នុងបុណ្យចូលឆ្នាំថ្មី ប្រពែណីជាតិរបស់ខ្លួន ប្រកបដោយស្មារតីគោរពស្រឡាញ់ប្រពៃណីវប្បធម៌របស់ខ្លួន មានការយល់ដឹងកាន់តែច្រើនអំពីវប្បធម៌ប្រពៃណីជាតិ ស្គាល់តម្លៃបរិស្ថាន ផ្តល់ភាពកក់ក្តៅជិតស្និទ្ធដល់ទេសចរជាតិនិងអន្តរជាតិ ហើយសមត្ថកិច្ចគ្រប់ផ្នែក គ្រប់ជាន់ថ្នាក់ ពិសេស សហភាពសហព័ន្ធយុវជនកម្ពុជា មានកិច្ចសហការគ្នា និងមានការទទួលខុសត្រូវខ្ពស់ក្នុងការរៀបចំចាត់តាំងព្រឹត្តការណ៍ សង្ក្រានបានយ៉ាងល្អនៅក្នុងក្របខណ្ឌទូទាំងប្រទេស។
សូមជម្រាបថា បើយោងតាមរបាយការណ៍បឋមរបស់មន្ទីរទេសចរណ៍រាជធានី-ខេត្ត តាមការវាយតម្លៃជំហានដំបូង ភ្ញៀវទេសចរ និងបងប្អូន ប្រជាពលរដ្ឋដែលបានដើរកម្សាន្តនៅតាមគោលដៅទេសចរណ៍សំខាន់ៗ និងតាមទីកន្លែងប្រារព្វព្រឹត្តិការណ៍ សង្ក្រាន្តសំខាន់ៗ នាឱកាសពិធីបុណ្យ ចូលឆ្នាំប្រពៃណីជាតិខ្មែរ ១៤-១៦ ខែមេសា ឆ្នាំ២០១៩ មានចំនួនសរុបប្រមាណ ៤.៧២៦.៦០២ នាក់ កើនឡើង ៦៧.០២% ក្នុងនោះ ភ្ញៀវជាតិមានចំនួន ៤.៦៣៩.៣៤១ នាក់ កើនឡើង ៦៦.៤០%
និង ភ្ញៀវអន្តរជាតិមានចំនួន ៨៣.១២៣ នាក់ កើនឡើង ៩៨.២៧% ៕
