ខេត្តព្រះសីហនុ ៖ តាមព័ត៌មានទទួលបាន ក្រុមអាជ្ញាធរបានចុះអនុវត្តដីកានៅលើដីរបស់ឈ្មោះ ជុំ សាវុធ ដែលត្រូវបានក្រុមអនាធិបតេយ្យមកពីតំបន់ផ្សេងៗ ប្រមាណជាង៣០០ គ្រួសារ បាននាំគ្នាមកធ្វើខ្ទម ដើម្បីយកដីនៅចំណុចភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ។
ទន្ទឺមនោះ ពលរដ្ឋបានផ្ទុះការតវ៉ាបិទផ្លូវជាតិលេខ៤ នៅព្រឹកមិញនេះ ខណដែលក្រុមអាជ្ញាធរបានចុះរុះរើសំណង់អានាធិបតេយ្យស្ថិតនៅឃុំបិទត្រាំង ស្រុកព្រៃនប់ ខេត្តព្រះសីហនុ ។
លោក មៀច ចាន់ មេឃុំបិទត្រាំង បញ្ជាក់ជូនថា ក្រុមអាណាធិបតេយ្យប្រមាណជាង៣០០០គ្រួសារនេះ ខ្លះមកពីសង្កាត់លេខ១ ក្រុងព្រះសីហនុ ខ្លះមកពីតំបន់ពយម៉ាចូវ ខ្លះមកពីតំបន់ឃុំបិតត្រាំង ឃុំបឹងតាព្រហ្ម និងតំបន់មួយចំនួននៃស្រុកកំពង់សិលា នៅខេត្តព្រះសីហនុ ក្រៅពីនេះក៏មានក្រុមខ្លះមកតាមមេខ្យល់អូសទាញមកពីខេត្តដទៃទៀត មានដូចជាខេត្តកំពត ខេត្តតាកែវ ខេត្តព្រៃវែង ខេត្តស្វាយរៀង និងខេត្តកំពង់ស្ពឺជាដើម។
លោកមេឃុំបានឲ្យដឹងថា បន្ទាប់ពីមានករណីនេះ អាជ្ញាធរ និងនគរបាល បានចុះសម្របមស្រួលហើយពន្យល់ដល់ក្រុមប្រជាពលរដ្ឋដែលបានចាញ់បោកមេខ្យល់ឱ្យបានយល់ដឹងអំពីទង្វើខុសច្បាប់ ដោយទៅកាន់កាប់លើដីមានម្ចាស់រួចហើយ។ ក្រោយពីសម្របសម្រួលនេះ ពួកគាត់ទាំងនោះក៏បានដកថយ ហើយសមត្ថកិច្ចក៏បានយកឈើដែលដាក់ឃាំងបិទផ្លូវនោះចេញ ដើម្បីឱ្យអ្នកដំណើរអាចឆ្លងកាត់ធម្មតាឡើងវិញ៕
