ខេត្តពោធិ៍សាត់ ៖ប្រជាពលរដ្ឋនៅក្នុងស្រុកភ្នំក្រវ៉ាញ និងស្រុកវាលវែង ខេត្តពោធិ៍សាត់ បានបង្ហើបឲ្យដឹងថា បច្ចុប្បន្នឈ្មួញធំៗជាច្រើននាក់ដូចជាមេឈ្មួញ តាំង អៀង. មេឈ្មួញ ណុប ឌី ហៅ(អាឆើត) មេឈ្មួញ ង៉ូវ ទី និងមេឈ្មួញដែលជាសាច់ញាតិមន្ត្រីជាន់ខ្ពស់ក្នុងសាលាខេត្តពោធិ៍សាត់ កំពុងបន្តកាប់ឈើនិងដឹកជញ្ជូនឈើចេញពីខេត្តពោធិ៍សាត់យ៉ាងរលូន បើទោះបីព្រៃឈើក្នុងតំបន់ដែនជម្រកសត្វព្រៃភ្នំឱរ៉ាល់ តំបន់ដែនជម្រកសត្វព្រៃភ្នំសំកុស និងតំបន់អភិរក្សជួរភ្នំក្រវាញភាគកណ្ដាល រងការបំផ្លាញយ៉ាងមហន្តរាយក៏ដោយ ក៏លោក សាយ សំអាល់ រដ្ឋមន្ត្រីក្រសួងបរិស្ថាន សម្ងំស្ងៀមឈឹងធ្វើមិនដឹងមិនឮអ្វីទាំងអស់។
ហេតុនេះហើយទើបប្រជាពលរដ្ឋមានការរិះគន់នឹងអំពាវនាវដល់សម្ដេចតេជោនាយករដ្ឋមន្ត្រី ហ៊ុន សែន ដែលជាប្រមុខរាជរដ្ឋាភិបាល មេត្តាជួយចេញបញ្ជាចាត់វិធានការទប់ស្កាត់បទល្មើសបំផ្លាញព្រៃឈើក្នុងតំបន់អភិរក្សនៅខេត្តពោធិ៍សាត់ ជាបន្ទាន់ ព្រោះលោក សាយ សំអាល់ រដ្ឋមន្ត្រីក្រសួងបរិស្ថាន កំពុងបណ្ដោយឲ្យលោក ប៉ាន់ មរកត និងមន្ត្រីក្រោមឱវាទនៅខេត្តពោធិ៍សាត់ ធ្វើអ្វីៗតាមអំពើចិត្តនាំគ្នាឃុបឃិតនិងក្រុមឈ្មួញកាប់បំផ្លាញព្រៃឈីយ៉ាងរង្គាល។
ប្រភពពីមន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តពោធិ៍សាត់ បានឲ្យដឹងថា រហូតមកដល់ពេលនេះមន្ត្រីបរិស្ថានប្រចាំតំបន់ដែនជម្រកសត្វព្រៃភ្នំឱរ៉ាល់ត្រូវបានគេឃុបឃិតឲ្យឈ្មួញធំៗកាប់ឈើនិងដឹកជញ្ជូនឈើចេញពីតំបន់នេះយ៉ាងអានាធិបតេយ្យ។
ប្រភពបានឲ្យដឹងទៀតថា លោក ប្រាក់ អ៊ីឡេង មន្ត្រីបរិស្ថានដែលមានអំណាចខ្លាំងខាងកាងបទល្មើសឈីនៅតំបន់ដែនជម្រកសត្វព្រៃភ្នំឱរ៉ាល់ កំពុងសប្បាយប្រមូលលុយពីក្រុមឈ្មួញកាប់ឈើនិងដឹកជញ្ជូនឈើចេញពីតំបន់នេះ ការដែលលោក ប្រាក់ អ៊ីឡេង ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់លោក ប៉ាន់ មរកត ដែលជាប្រធានមន្ទីរបរិស្ថានខេត្តពោធិ៍សាត់ ផងដែរទើបអ្វីៗអាចប្រព្រឹត្តទៅដោយរលូន សូម្បីតែលោក សាយ សំអាល់ រដ្ឋមន្ត្រីក្រសួងបរិស្ថាន ក៏រក្សាភាពស្ងៀមស្ងាត់មិនមានវិធានការទប់ស្កាត់ទេ ទុកឲ្យលោក ប៉ាន់ មរកត និងលោក ប្រាក់ អ៊ីឡេង ធ្វើអ្វីៗតាមអំពើចិត្ត ក្នុងខណៈដែលព្រៃឈើដែលនៅសេសសល់ក្នុងខេត្តពោធិ៍សាត់ កំពុងប្រឈមនឹងសេចក្ដីវិនាសហិនហោចនាពេលខាងមុខជាក់ជាមិនខាននោះទេ។
បើតាមមន្ត្រីរាជការក៍ជូចជាអាជ្ញាធរមូលដ្ឋាននឹងនៅក្នុងមន្ទីរបរិស្ថានខេត្តពោធិ៍សាត់មួយចំនួនបានបង្ហើបឲ្យដឹងថា ការដែលមន្ត្រីបរិស្ថានប្រចាំតំបន់ដែនជម្រកសត្វព្រៃភ្នំសំកុស និងតំបន់អភិរក្សជួរភ្នំក្រវ៉ាញភាគកណ្ដាល ឃុបឃិតឲ្យឈ្មួញកាប់ឈើនិងដឹកជញ្ជូនឈើខុសច្បាប់ គឺមានការបើកដៃពីសំណាក់លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ ដែលល្បីល្បាញខាងប្រព្រឹត្តអំពើពុករលួយជាយូរមកហើយ តែមិនដែលឃីញអង្គភាពប្រឆាំងអំពីពុករលួយមានការចុះអង្កេតស្រាវជ្រាវករណីខាងលើនេះឡីយ។
ជុំវិញការចោទប្រកាន់ខាងលើ គេហទំព័រយើងនៅពុំទាន់អាចទំនាក់ទំនងសុំការបំភ្លឺពីអ្នកជាប់ពាក់ព័ន្ធបាននៅឡើយ ហើយក្រុមការងារយើងនិងធ្វើបច្ចុប្បន្នភាពបន្តជុំវិញបញ្ហាខាងលើ និងស្វាគមន៏រាល់ការបំភ្លឺជានិច្ច៕
