ខេត្តកំពង់ធំ ៖ នៅក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធឆ្លងឧបដ្ឋានសាលា ដែលជាសមិទ្ធិផលថ្មីបន្ថែមទៀត និងស្រោចស្រពព្រះសុគន្ធវារីប្រគេនព្រះគ្រូចៅអធិការវត្តសែនសិរី ហៅវត្តក្តីសែន ស្ថិតក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ដោយតបតាមការអញ្ជើញរបស់ព្រះគ្រូចៅអធិការ គណៈកម្មការអាចារ្យនិងពុទ្ធបរិស័ទ នាព្រឹកថ្ងៃទី០៦ ខែមេសា ឆ្នាំ២០១៩ បានថ្លែងទៅកាន់អង្គពិធីដែលមានអ្នកចូលរួមប្រមាណជាង២០០០នាក់ នាឱកាសនេះ ឯកឧត្តមបណ្ឌិត ងួន ញ៉ិល អនុប្រធានទី១នៃរដ្ឋសភា បានមានប្រសាសន៍លើកឡើងថាវត្តអារាមមិនគ្រាន់តែជាទីសក្ការៈសម្រាប់គោរពបូជា តាមផ្លូវជំនឿសាសនាប៉ុណ្ណោះទេ ប៉ុន្តែថែមទាំងជាថ្នាលបណ្តុះបណ្តាលនូវចំណេះដឹង សីលធម៌ និងសាមគ្គីភាពរឹងមាំ តាមផ្លូវពុទ្ធចក្រនិងអាណាចក្រទៀតផង។
លោក ម៉ាក់ ប៊ុនហុង អភិបាលក្រុងស្ទឹងសែន បានអញ្ជើញអានសុន្ទរកថាស្វាគមន៍និងរបាយការណ៍សាងសង់ បានឲ្យដឹងថា វត្តសែនសិរី ហៅវត្តក្តីសែន នេះមានអាយុកាល១០២ឆ្នាំ មកហើយ។ ឧបដ្ឋានសាលាដែលកំពុង ធ្វើពិធីសម្ភោធឆ្លងនៅពេលនះ បានចំណាយថវិកាសាងសង់អស់សរុបចំនួន២១២,៥៣៨ ដុល្លារសហរដ្ឋអាមេរិក ក្រោមការជួយឧបត្ថម្ភដ៍ថ្ងៃថ្លារបស់ឯកឧត្តមបណ្ឌិត ងួន ញ៉ិល និងសប្បុរសជនទាំងអស់។
ឯកឧត្តមបណ្ឌិត ងួន ញ៉ិល បានអញ្ជើញមានប្រសាសន៍សំណេះសំណាលចំពោះព្រះសង្ឃ មន្ត្រីរាជការ ប្រជាពលរដ្ឋទាំងអស់ ដោយបានសម្តែងនូវសេចក្តីសោមនស្សរីករាយនឹងវាយតំលៃខ្ពស់ ចំពោះការរីកចម្រើនឥតឈប់ឈ និងសមិទ្ធផលនានារបស់វត្តក្តីសែនផងដែរ។ ឯកឧត្តមបណ្ឌិតអនុប្រធានទី១រដ្ឋសភា បានមានប្រសាសន៍បញ្ជាក់អំពីសារៈសំខាន់នៃសុខ សន្តិភាព និងស្ថេរភាពរបស់ប្រទេសជាតិ ដើម្បីបម្រើឱ្យកាអភិវឌ្ឍន៍លើគ្រប់វិស័យ ដូចក្នុងពេលបច្ចុប្បន្ននេះ និងបានលើកឡើង ពីគុណតម្លៃនៃសុខសន្តិភាព ហើយថាសមិទ្ធផលដែលបានកសាងឡើង និងដាក់សម្ពោធនាពេលនេះ គឺវាបានកើតឡើងដោយសារប្រទេសមានសុខសន្តិភាព ក្រោមនយោបាយឈ្នះ-ឈ្នះរបស់ សម្តេចអគ្គមហាសេនាបតីតេជា ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមបណ្ឌិតបញ្ជាក់ថា គោលនយោបាយរបស់រាជរដ្ឋាភិបាល ក៏ដូចជាថ្នាក់ដឹកនាំ គ្រប់ជាន់ថ្នាក់បានខិតខំណាស់ក្នុងការបម្រើប្រជាពលរដ្ឋ។ ចំពោះប្រព័ន្ធអនុគ្រោះពន្ធEBA របស់សហគមន៍អ៊ឺរ៉ុប ឯកឧត្តមបណ្ឌិតបានបញ្ចាក់ អំពីប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ទោះកម្ពុជាមានឫមិនមានប្រព័ន្ធអនុគ្រោះពន្ធEBA ក៍កម្ពុជាមិនស្លាប់ដែរ។
ឆ្លៀតក្នុងឱកាសនេះដែរ ឯកឧត្តមបណ្ឌិត ងួន ញ៉ិល ក៏បាននាំនូវបច្ច័យចំនួន២០លានរៀល ប្រគេនព្រះគ្រូចៅអធិការវត្តសែនសិរសិហៅវត្តក្តីសែន ដើម្បីរួមចំណែក ដោះស្រាយការចំណាយនានាក្នុងការកសាងសមិទ្ធផលផ្សេងៗនៅក្នុងវត្ត។ ប្រគេនព្រះមេគណខេត្តកំពង់ធំ ទេយ្យទាន១ប្រអប់ បច្ច័យ៤០ម៉ឺនរៀល។ ប្រគេនព្រះអនុគុណ ក្រុងស្ទឹងសែនទេយ្យទាន១ប្រអប់ បច្ច័យ២០ម៉ឺនរៀល។ ប្រគេនព្រះចៅអធិការវត្ត៥អង្គ ក្នុងមួយអង្គទេយ្យទាន១ប្រអប់ បច្ច័យ ១០ម៉ឺនរៀល។ ជូនលោកយាយ លោកតា ១០០នាក់ ក្នុង១នាក់ទទួលបានក្រណាត់ស១ដុំ និងថវិកា១ម៉ឺនរៀល។ ប្រជាពលរដ្ឋ១៥០០នាក់ ក្នុង១នាក់ទទួលបានសារ៉ុង១។ លោកគ្រូ អ្នកគ្រូ ២១០នាក់ ក្នុង១នាក់ថវិកា២ម៉ឺនរៀល។ យុវជនកាយរិទ្ធិ-យុវជនកាកបាទក្រហម ៥០នាក់ ទទួលបានថវិកាម្នាក់១ម៉ឺនរៀល។ សិស្សានុសិស្សចំនួន៧៦៦នាក់ ទទួលបានក្នុងម្នាក់សៀវភៅ១ក្បាល ប៊ិច១ដើម និងថវិកាចំនួន៥ពាន់រៀល៕ដោយ តេច ឆេង
