ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា កម្ពុជា នឹងលុបចោលថ្ងៃឈប់សម្រាកបុណ្យ និងទិវាចំនួន៧ថ្ងៃ ដែលផ្ដើមអនុវត្តន៍ចាប់ពីឆ្នាំ២០២០ទៅ ដើម្បីរួមចំណែកដល់ការលើកកម្ពស់ផលិតភាព និងសម្រួលពាណិជ្ជកម្មរបស់កម្ពុជាបន្ថែមទៀត។
សម្តេចតេជោបានបន្តថា សម្រាប់កម្ពុជានាពេលកន្លងមក យើងមានថ្ងៃឈប់សម្រាកពី២៨ ទៅ៣០ថ្ងៃ ក្នុងមួយឆ្នាំ នៅពេលដែលប្រទេសជិតខាង ដូចជា វៀតណាម មានតែ១៣ថ្ងៃ ប្រទេសឡាវ មានតែ១២ថ្ងៃ ប្រទេសថៃ មាន១៦ថ្ងៃ ប្រទេសសិង្ហបុរី មាន១១ថ្ងៃ។
សម្ដេចតេជោបានមានប្រសាសន៍ថា លោកឧកញ៉ា វ៉ាន់ សូអៀង ប្រធានសមាគរោងចក្រកាត់ដេរនៅកម្ពុជា បានស្នើសុំឲ្យរាជរដ្ឋាភិបាលពិចារណាកាត់បន្ថយថ្ងៃសម្រាកបុណ្យ និងទិវា។ ជាការពិតយើងពិនិត្យឃើញថា ថ្ងៃឈប់សម្រាកប្រចាំឆ្នាំនៅកម្ពុជាមានចំនួនច្រើនជាងប្រទេសជិតខាង។
សម្ដេចតេជោបានគូសបញ្ជាក់បន្ថែមថា ការកាត់បន្ថយចំនួនថ្ងៃឈប់សម្រាកការងារនេះ គឺមិនមែនមានន័យថា ជាការលុបបំបាត់ចោលនូវពិធីបុណ្យ ព្រះរាជពិធី និងទិវាជាតិ អន្តរជាតិ ដែលរាជរដ្ឋាភិបាល និងប្រជាជនកម្ពុជា តែងតែប្រារព្ធធ្វើយ៉ាងខ្ជាប់ខ្ជួនកន្លងមកនោះទេ ក៏ប៉ុន្តែចំថ្ងៃនៃការប្រារព្ធពិធីនោះ មន្ត្រីរាជការក្នុងវិស័យសាធារណៈ និងនិយោជិត កម្មករក្នុងវិស័យឯកជនទាំងអស់ត្រូវបំពេញការងារជាធម្មតា៕
