រាជធានីភ្នំពេញ ៖ នៅព្រឹកថ្ងៃច័ន្ទ ទី២៥ ខែមិនា ឆ្នាំ២០១៩ អតីតមន្ត្រីជាន់ខ្ពស់អតីតគណបក្សសង្គ្រោះជាតិ៥រូប បានធ្វើសន្និសីទសារព័ត៌មាន ដើម្បីបញ្ជាក់ពីគោលជំហររបស់ពួកគេ បន្ទាប់ពីពួកគេទទួលបានសិទ្ធិធ្វើនយោបាយឡើងវិញ ហើយរងការចោទប្រកាន់ថា បានលក់ឧត្តមគតិ ឬលក់ខ្លួន ឲ្យគណបក្សប្រជាជនកម្ពុជា។ លោក អ៊ូ ច័ន្ទរ័ត្ន បានថ្លែងអះអាងថា អ្នកនយោបាយទាំង៥រូប នឹងមិនទៅបង្កើតគណបក្សថ្មី ឬទៅចុះចូលជាមួយគណបក្សនយោបាយណាមួយឡើយ។
សូមបញ្ជាក់ថា មកទល់ពេលនេះ គឺមានអ្នកនយោបាយចំនួន៩រូបហើយ ដែលទទួលបានសិទ្ធិធ្វើនយោបាយឡើងវិញ នៅក្នុងចំណោមអ្នកនយោបាយរបស់អតីតគណបក្សង្គ្រោះជាតិចំនួន១១៨រូប ដែលត្រូវបានហាមឃាត់ធ្វើនយោបាយ៥ឆ្នាំ។
លោក អ៊ូ ច័ន្ទរ័ត្ន បានបញ្ជាក់ថា គោលជំហររបស់ពួកគាត់ ដែលទទួលបានសិទ្ធិធ្វើនយោបាយឡើងវិញ គឺនៅតែបន្តទាមទារ ឲ្យដោះលែង លោក កឹម សុខា ដើម្បីឲ្យមានឱកាសដឹកនាំសកម្មភាពនយោបាយឡើងវិញ ហើយបន្តទាមទារឲ្យរដ្ឋាភិបាលពិចារណាផ្តល់តំណែងក្រុមប្រឹក្សាឃុំ សង្កាត់ ដល់អតីតគណបក្សសង្គ្រោះជាតិ និងចង់ឲ្យមានការផ្សះផ្សារជាតិ ដោយប្រើប្រាស់វប្បធម៌សន្ទនាដែលជាគំរូដល់អ្នកជំនាន់ក្រោយផងដែរ ។
ប៉ុន្តែលោក អ៊ូ ច័ន្ទរ័ត្ន បានបដិសេធចំពោះការចោទប្រកាន់ថា លោករួមទាំងសហការី៤រូបទៀតលក់ឧត្តមគតិ ឬលក់ខ្លួនឲ្យគណបក្សប្រជាជនកម្ពុជា ។ មិនតែប៉ុណ្ណោះ ពួកគេបានជេរប្រមាថលាបពណ៌ក្រុមលោកថែមទៀត ។ លោកថា អ្នកជេរប្រមាថលោក គឺមានលក្ខណៈជាប្រព័ន្ធនិងជាអាជីពរបស់ពួកគេ ហើយបានរៀបចំឡើងដោយអ្នកនយោបាយផងដែរ ។ ប៉ុន្តែលោកមិនខ្វល់នោះទេ ព្រោះថាអ្វីដែលលោកខ្វល់គឺសង្គមជាតិ ៕
