រាជធានីភ្នំពេញ ៖ ថ្លែងជាសារណៈ សម្តេច ហ៊ុន សែន បានព្រមានដកតំណែងមេបញ្ជាការកងរាជអាវុធហត្ថខេត្តក្រចេះ លោកឧត្តមសេនីយ៍ត្រី សាន្ត ប៊ុនថាន ប្រសិនបើមិននាំកូនប្រុសឈ្មោះ សាន្ត សុខុម ជាមន្ត្រីអាវុធហត្ថ ចូលខ្លួនដោះស្រាយ ករណីប្រើហិង្សាលើយុវជនពីរនាក់ នៅក្នុងខេត្តកំពង់ចាមនាពេលកន្លងទៅ ដែលផ្អើលពេញបណ្តាញសង្គម ។
ក្នុងពិធីចែកសញ្ញាបត្រដល់និស្សិត នៅថ្ងៃទី២៥ ខែមីនា នេះ សម្តេច ហ៊ុន សែន នាយករដ្ឋមន្រ្តីនៃកម្ពុជា បានថ្លែងសារដោយផ្តាំទៅមេបញ្ជាការកងរាជអាវុធហត្ថខេត្តក្រចេះ សូមបញ្ចុះបញ្ចូលកូនរបស់ខ្លួនចូលមកកាន់តុលាការ ក្រោយពីមានដីកាកោះហៅរបស់តុលាការខេត្តកំពង់ចាម ពាក់ព័ន្ធនឹងអំពើហិង្សាដោយប្រើប្រាស់កាំភ្លើងភ្ជង់ ក្នុងទំនាស់មួយក្នុងហាងអ៊ីនធឺណេត។
សូមជម្រាបថា កូនប្រុសលោកឧត្តមសេនីយ៍ត្រី សាន្ត ប៊ុនថាន គឺលោក សាន្ត សុខុម ដែលជាមន្ត្រីអាវុធហត្ថខេត្តក្រចេះពាក់ស័ក្តិ៤ កាលពីថ្ងៃទី១៩ ខែមីនា ឆ្នាំ២០១៩ កន្លងទៅនេះ បានប្រើហិង្សាទៅលើយុវជនពីរនាក់នៅកន្លែងលេងអ៉ីនធើណេតមួយកន្លែងក្នុងខេត្តកំពង់ចាម ។ ទន្ទឹមនឹងការប្រើហិង្សាជនបង្ករូបនោះថែមទាំងបានដកកាំភ្លើងភ្ជង់លើយុវជនពីររូបនោះថែមទៀត ។ ប៉ុន្តែក្រោយមកជនរងគ្រោះឈ្មោះ វ៉ាន់ ចាន់អទិច្ចបញ្ញា និងឈ្មោះ យ៉េ ចិន្តា បានដាក់ពាក្យបណ្តឹងទៅតុលាការ ។ បន្ទាប់មកតុលាការក៏បានចេញដីកាឲ្យកូនប្រុសមេបញ្ជាការអាវុធហត្ថខេត្តក្រចេះឈ្មោះ សាន្ត សុខុម ចូលខ្លួននៅមុខអយ្យការ ឲ្យបានមុនថ្ងៃទី២៦ ខែមេសា ឆ្នាំ២០១៩ ដើម្បីដោះស្រាយបញ្ហាប្រើអំពើហិង្សានេះ ៕
សម្តេចតេជោបានមានប្រសាសន៍ថា «សូមផ្តាំទៅមេប៉េអឹមខេត្តក្រចេះ សូមបញ្ចុះបញ្ចូលកូនឲ្យចូលខ្លួនតាមដីកាកោះហៅរបស់តុលាការខេត្តកំពង់ចាម»។ សម្តេចបញ្ជាក់ថា សម្តេចមិនធ្វើអីទេ គឺមានតែដកតួនាទីឪពុកចោលតែប៉ុណ្ណោះ ព្រោះកូនរបស់ខ្លួនមានកាំភ្លើងដើរភ្ជង់គេឯង។
សូមបញ្ជាក់ថា កាលពីថ្ងៃទី២៤ ខែមីនា ម្សិលមិញ សាលាដំបូងខេត្តកំពង់ចាម បានចេញដីកាបញ្ជាឲ្យចូលខ្លួន ដល់ឈ្មោះ សាន្ត សុខុម ដែលគេដឹងថា ជាកូនប្រុសរបស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ពាក់ព័ន្ធនឹងបណ្តឹងព្រហ្មទណ្ឌ ពីបទ «ហិង្សាដោយចេតនាមានស្ថានទម្ងន់ទោស ដោយគំរាមកំហែងនឹងអាវុធ»។
តាមដីកានោះឲ្យដឹងថា កាលពីថ្ងៃទី១៨ ខែមីនា ឆ្នាំ២០១៩ វេលាម៉ោង ២៣ និង៤៥នាទី ខណៈពេលដែលឈ្មោះ វ៉ាន់ ចាន់អទិច្ចបញ្ញា និងឈ្មោះ យ៉េ ចិន្តា កំពុងលេងហ្គេមតាមអនឡាញ នៅផ្ទះណេតយីហោ ៥០៧ ស្ថិតនៅក្នុងភូមិទី១ សង្កាត់វាលវង់ ក្រុងកំពង់ចាម ស្រាប់តែមានឈ្មោះ សាន្ត សុខុម ភេទប្រុស អាយុប្រហែល៣០ឆ្នាំ បានជិះរថយន្តម៉ាកឡង់គ្រីស័រ ពណ៌ស ពាក់ស្លាកលេខខេមរភូមិន្ទ បានមកចាប់ទាញឈ្មោះ វ៉ាន់ ចាន់អទិច្ចបញ្ញា និងឈ្មោះ យ៉េ ចិន្តា ចូលក្នុងរថយន្ត និងបានដកកាំភ្លើងខ្លីម៉ាកឡុកបញ្ចូលគ្រាប់ភ្ជង់ឈ្មោះ វ៉ាន់ ចាន់អទិច្ចបញ្ញា និងឈ្មោះ យ៉េ ចិន្តា តែពួកគេទាំងពីរនាក់បានរត់ចុះពីលើរថយន្ត ហើយឈ្មោះ សាន្ត សុខុម បានតាមទៅវាយជនរងគ្រោះជាច្រើនដៃដល់ក្នុងណេត និងភ្ជង់គម្រាមម្តងទៀត។
យ៉ាងណាក៏ដោយ សាលាដំបូងខេត្តកំពង់ចាម បានបញ្ជាឲ្យឈ្មោះ សាន្ត សុខុម ចូលខ្លួនឲ្យបានមុនថ្ងៃទី២៦ ខែមេសា ឆ្នាំ២០១៩ ហើយក៏បង្គាប់មកស្នងការនគរបាលខេត្តកំពង់ចាម ត្រូវអនុវត្តដីកានេះឲ្យបានសំរេច៕
