រាជធានីភ្នំពេញ ៖ នៅវិមានសន្តិភាព នៅព្រឹកថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញទទួលសញ្ញាបត្របណ្ឌិតកិត្តិយស ផ្នែកទំនាក់ទំនងនយោបាយពី Krirk University នៅប្រទេសថៃ។ នៅក្នុងពិធីឧត្តុង្គឧត្តមនេះ ក៏មានការអញ្ជើញចូលរួមពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែននិងបុត្រាបុត្រីក្រុមគ្រួសារផងដែរ។
សម្តេច ហ៊ុន សែន បានថ្លែងបញ្ជាក់ថា សញ្ញាប័ត្រដែលសម្តេចទទួលបាននាពេលនេះគឺជាមោទ នភាពរបស់ប្រជាជនកម្ពុជា និងប្រទេសជាតិទាំងមូល ។ សម្តេចបន្តថា មោទនភាពដែលសម្តេច មាននៅពេលនេះ គឺជាមោទនភាព របស់ប្រជាជនកម្ពុជាក្នុងបុព្វហេតុជាតិមាតុភូមិ ហើយប្រជាពលរដ្ឋតែងតែគាំំទ្រ និងជឿជាក់លើរូបខ្ញុំ និងគណបក្សប្រជាជនកម្ពុជា ក្នុងការដឹកនាំប្រទេសកន្លងមក។
សម្តេចបន្តថា ជាក់ស្តែង ក្នុងការបោះឆ្នោត ជ្រើសតាំងតំណាងរាស្ដ្រ នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ មានប្រជាជន ចូលរួមបោះឆ្នោត រហូតដល់៨៣,២ភាគរយ នៃអ្នកដែលមានឈ្មោះក្នុងបញ្ជីបោះឆ្នោត បានចេញទៅបោះឆ្នោត ជាមួយនឹងទឹកមុខ សប្បាយរីករាយគ្រប់ៗគ្នា ធ្វើឲ្យគណបក្សប្រជាជនកម្ពុជា ឈ្នះភ្លូកទីកភ្លូកដី ក្នុងការបោះឆ្នោត ជ្រើសតាំងតំណាងរាស្ដ្រ នីតិកាលទី៦នេះ ដើម្បីឲ្យរូបសម្តេច និងគណបក្សប្រជាជន បានបន្តដឹកនាំប្រទេសជាតិ តទៅមុខទៀត។
សម្តេចបានលើកឡើងថា បន្ទាប់ពីកម្ពុជា ទទួលបានសុខសន្តិភាពពេញលេញ នៅចុងឆ្នាំ១៩៩៨ សេដ្ឋកិច្ចកម្ពុជា មានការរីកចម្រើនគួរឲ្យកត់សម្គាល់, ក្នុងរយៈពេលជិត២ទសវត្សរ៍ចុងក្រោយនេះ កម្ពុជាទទួលបានចំណាត់ថ្នាក់ ជាប្រទេសដែលមានកំណើន សេដ្ឋកិច្ចខ្ពស់ និងលឿនបំផុត លំដាប់ទី៦ លើពិភពលោក តាមរយៈការរីកចម្រើនជាបន្តបន្ទាប់ លើវិស័យឧស្សាហកម្ម សំណង់ កសិកម្ម សេវាកម្ម ទេសចរណ៍ អចលនទ្រព្យ គមនាគមន៍ និងការដឹកជព្ជួន។
លោក ក្រាស៊ែ ឆាណាវង្ស ប្រធានសាកលវិទ្យាល័យគ្រើក បានសរសើរនូវអ្វីដែលលោកបានមើលឃើញពីគុណសម្បត្តិ របស់សម្ដេច ហ៊ុន សែន ក្នុងការដឹកនាំ ជាពិសេស ដំណើរការចរចា បង្រួបបង្រួមជាតិ ឲ្យប្រទេសមានសុខសន្តិភាព ដោយសម្ដេច បានប្រើប្រាស់នូវការឈ្លាសវៃរបស់ខ្លួន បានក្លាយជានាយករដ្ឋមន្ត្រីកម្ពុជា នៅក្នុងការបោះឆ្នោត ការរីកចម្រើនរបស់កម្ពុជា។
លោកបន្ថែមថា បច្ចុប្បន្ននេះ សេដ្ឋកិច្ចកម្ពុជា បានហក់ឡើងយ៉ាងខ្ពស់ ជាប្រទេសដែលមានការអភិវឌ្ឍខ្ពស់ មានការរីកលូតលាស់ យ៉ាងឆាប់រហ័ស ជាប្រទេស ដែលមានវិនិយោគិនចូលមកច្រើន ដោយសារសុខសន្តិភាព ដោយសារជំនឿទុកចិត្ត ដែលនាំប្រទេសកម្ពុជា ឲ្យស្មើនឹងប្រទេសអាស៊ានដទៃទៀត៕
