រាជធានីភ្នំពេញ ៖ សាលាដំបូងរាជធានីភ្នំពេញ បានចេញដីកាមួយ បង្គាប់ឱ្យសមត្ថកិច្ច តាមចាប់ខ្លួនលោក សម រង្ស៉ី និងបក្ខពួក៧នាក់ទៀត ដែលជាអតីតថ្នាក់ដឹកនាំគណបក្សសង្គ្រោះជាតិ កំពុងនិរទេសខ្លួននៅស្រុកក្រៅ ពាក់ព័ន្ធនឹងសំណុំរឿងក្បត់ជាតិថ្មីមួយបន្ថែមទៀត ។ នេះបើយោងតាមដីកាតុលាការក្រុងភ្នំពេញ របស់ចៅក្រមស៊ើបសួរលោក កូយ សៅ ដែលត្រូវបានផ្សព្វផ្សាយកាលពីម្សិលមិញ ។
យោងតាមដីកាខាងលើនេះ តុលាការបានបញ្ជាឲ្យតាមចាប់ខ្លួនអតីតថ្នាក់ដឹកនាំ នៃអតីតគណបក្សសង្គ្រោះជាតិ ដែលរួមមាន ១៖ លោក សម រង្ស៉ី ២៖ លោក អេង ឆៃអ៊ាង ៣៖ លោកស្រី មូរ សុខហួរ ៤៖ លោក អ៊ូ ច័ន្ទឫទ្ធិ ៥៖ លោក ហូ វ៉ាន់ ៦៖ លោក ឡុង រី ៧៖ លោក ម៉ែន សុថាវរិន្ទ្រ និង៨៖ លោក តុ វ៉ាន់ចាន់។
តាមចំណាត់ការរបស់តុលាការ គឺធ្វើឡើងបន្ទាប់ពី លោក សម រង្ស៉ី និងបក្ខពួក បានញុះញង់ឱ្យប្រជាពលរដ្ឋ និងទាហាន ងើបប្រឆាំងរាជរដ្ឋាភិបាលដែលនាំឲ្យប៉ះពាល់ធ្ងន់ធ្ងរដល់សន្តិសុខជាតិ ៕
