ខេត្តកោះកុង ៖ នៅវេលាម៉ោង១១.៣៥នាទីព្រឹក នាថ្ងៃទី១៣ ខែមីនា ឆ្នាំ២០១៩ មានគ្រោះអគ្គីភ័យមួយបានកើតឡើង ត្រង់ចំនុចខាងក្រោយសាលាសង្កាត់ស្មាច់មានជ័យ ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ដែលបានបង្កអោយមានការខូចខាតផ្ទះពលរដ្ឋចំនួន២ខ្នង ស្ទើរទាំងស្រុង និងសម្ភារះមួយចំនួនផងដែរ ។
សមត្ថកិច្ចបានអោយដឹងថា ផ្ទះដែលរងការខូចខាតដោយសារគ្រោះអគ្គីភ័យនោះ ជាផ្ទះកំសាន្តលំហែកាយ របស់លោកជំទាវ ជា សំអាត ដែលមានទំហំ ៨X៩ ម៉ែត្រ សាងសង់អំពីឈើ ជញ្ជាំងស្បូវ តំបូលប្រក់ស្បូវ ។
សមត្ថកិច្ចបានបន្តថា ក្នុងនោះក៏មានការខូចខាតនូវទ្រព្យសម្បត្តិមួយចំនួនផងដែរ រូមមាន ៖ ម៉ាស៊ីនត្រជាក់ចំនួន២គ្រឿង ពូក២ កង្ហារព្យួរជញ្ជាំង២គ្រឿង ធុងទឹក២ កញ្ចក់២ផ្ទាំងធំ និង អំពូលភ្លើង៣០អំពូល ។
ប្រភពខាងលើបានលើកឡើងទៀតថា ចំពោះករណីគ្រោះអគ្គីភ័យនេះសមត្ថកិច្ចនគរបាលស្នងការដ្ឋាននគរបាលខេត្តកោះកុងបានសហការជាមួយកម្លាំងសមត្ថកិច្ចនគរបាលក្រុងខេមរភូមិន្ទ កងកម្លាំងអាវុធហត្ថខេត្ត ក្រុង ក្រុមហ៊ុន SEZ CO.LTD និង ឈ្មោះ សៀង បូរ៉ាត់ បានចុះអន្តរាគមន៍ដោយប្រើប្រាស់នូវឡានទឹកសរុបចំនួន៧គ្រឿង ។
សមត្ថកិច្ចបានបន្តថាចំពោះមូលហេតុដែលបង្កអោយមានជាអគ្គីភ័យកើតឡើងនេះ គឺខាងសមត្ថកិច្ចនៅពុំទាន់អាចបញ្ជាក់បានច្បាស់ថាបណ្តាលមកពីមូលហេតុអ្វីនោះទេ ព្រោះកម្លាំងសមត្ថកិច្ចកំពុងធ្វើការស្រាវជ្រាវដើម្បីរកមូលហេតុ ។
ជាមួយគ្នានេះដែរ លោក ឈេង សុវណ្ណដា អភិបាលនៃគណះអភិបាលក្រុងខេមរភូមិន្ទ បានអំពាវនាវដល់បងប្អូនប្រជាពលរដ្ឋអោយមានការប្រុងប្រយ័ត្នចំពោះភ្លើងទៀន ប្រព័ន្ធអគ្គីសនី ការចោលកន្ទុយបារី និងសូមអោយបងប្អូនមានការសហការក្នុងការជួយផ្តល់ដំណឹងជូនដល់កម្លាំងសមត្ថកិច្ចអោយបានទាន់ពេលវេលា ហើយបងប្អូនប្រជាពលរដ្ឋដែលនៅជិតខាង ត្រូវជួយគ្នាបើសិនជាហេតុការណាមួយកើតឡើង ពិសេសគឺខាងអាជ្ញាធរសូមអំពាវនាវដល់បងប្អូនប្រជាពលរដ្ឋទាំងអស់ចាំបាច់ត្រូវមានបំពង់ពន្លត់អគ្គីភ័យយ៉ាងតិច១បំពង់ក្នុងផ្ទះ ដោយឡែកចំពោះបងប្អូនដែលមានដីចំការនៅពេលដុតភ្លើងមេត្តាធ្វើផ្លូវភ្លើងជាមុនសិនដើម្បីជាការជៀសវាងក្នុងការកើតឩបត្តហេតុណាមួយជាយថាហេតុ ៕ដោយ ទៀង យិន
