រាជធានីភ្នំពេញ ៖ យោងតាមការចុះផ្សាយនៅមុននេះបន្តិចរបស់សារព័ត៌មាន Fresh News បានឲ្យដឹងថា មន្ត្រីអគ្គនាយករដ្ឋាករទឹកស្វយ័តក្រុងភ្នំពេញ បានអំពាវនាវប្រជាពលរដ្ឋ ប្រើប្រាស់ទឹកដោយសន្សំសំចៃ ដើម្បីរក្សាទឹកទុកប្រើប្រាស់ ផងក៏ដូចជាចែករំលែកទឹកដល់ប្រជាពលរដ្ឋ នៅតាមជាយៗក្រុង មានប្រើប្រាស់ស្អាតប្រើប្រាស់ផងដែរ។
តាមមន្ត្រីរដ្ឋាករទឹកបានបញ្ជាក់ថា ឆ្នាំនេះកម្ពុជានឹងទទួលរងនូវអាកាសធាតុក្ដៅ ខុសពីអាកាសធាតុរៀងរាល់ឆ្នាំ ដូចនេះយើងគួរត្រូវបានរក្សាទឹកប្រើប្រាស់ ឬក៏ជួយកាត់បន្ថយ ដើម្បីចែកគ្នាប្រើប្រាស់ ដោយមិនគួរប្រើប្រាស់ច្រើនដូចជា ការលាងសម្អាតផ្ទះ, ការស្រោចសួនច្បារ ឬក៏លាងឡានជាញឹកញយ ដែលកត្តាទាំងអស់នេះ ហើយអាចធ្វើសម្ពាធទឹកប្រើប្រាស់មានការថមថយ ។
ទន្ទឹមនោះអគ្គនាយកដ្ឋានរដ្ឋាករទឹកស្វយ័តក្រុងភ្នំពេញក៏សូមការអធ្យាស្រ័យ និងយោគយល់ពីបងប្អូនប្រជាពលរដ្ឋ ចំពោះការខ្វះចន្លោះ នៃការផ្តល់សេវាផ្គត់ផ្គង់ទឹកស្អាត ពិសេសបញ្ហាចុះខ្សោយនៃសម្ពាធទឹក ប៉ុន្តែរដ្ឋាករទឹកបានកំពុងព្យាយាមដោះស្រាយ ជូនបងប្អូនប្រជាពលរដ្ឋ តាមរយៈការវិនិយោគសាងសង់រោងចក្រផលិតទឹកស្អាតថ្មីៗថែមទៀត ដើម្បីបម្រើដល់សេចក្តីត្រូវការរបស់ប្រជាពលរដ្ឋ៕
