ខេត្តកំពង់ធំ ៖ មានប្រសាសន៏ក្នុងពិធីបិទសន្និបាតបូកសរុបលទ្ធផលការងារ អនុវត្តឆ្នាំ២០១៨ និងលើកទិសដៅអនុវត្តបន្តការងារឆ្នាំ២០១៩ ធ្វើឡើងនៅសាលប្រជុំសាលាខេត្តកំពង់ធំ ចំនួនពីរថ្ងៃ គឺថ្ងៃទី៦ ដល់ល្ងាចទី៧ ខែមិនា ឆ្នាំ២០១៩ ឯកឧត្តម បណ្ឌិត ថោង ខុន រដ្ឋមន្រ្តីក្រសួងទេសចរ ប្រធានក្រុមការងារថ្នាក់ជាតិចុះមូលដ្ឋានខេត្តកំពង់ធំ បានអំពាវនាដល់កម្លាំងសមត្ថកិច្ចនិងអាជ្ញាធរមូលដ្ឋានត្រូវមានវិធានការទប់ស្កាត់បទល្មើសនានាក្នុងខេត្ត មានដូចជា បទល្មើសព្រៃឈើ បទល្មើសនេសាទ បញ្ហាទំនាស់ដីធ្លី និងគ្រឿងញៀន ឲ្យបានល្អប្រសើរ ដើម្បីជម្រុញឲ្យមានការទាក់ទាញអ្នកវិនិយោគរបស់បរទេសឲ្យបានច្រើន ដូចជា រោងចក្រកែច្នៃកសិផល ការធ្វើគ្រឿងបន្លាស់នានា ដើម្បីនាំចេញទៅទីផ្សាលើសកលលោក ក៏ជាការបង្កើតការងារដល់ប្រជាពលរដ្ឋ ជារឿងដែលត្រូវបានយកចិត្តទុកដាក់ ជាពិសេសវិស័យទេសចរណ៍ និងកសិកម្មកែច្នៃ ខេត្តកំពង់ធំ មានប៉ូលទេសចរណ៍ដ៏ធំ និងត្រូវធ្វើយ៉ាងណា ឲ្យខេត្តទាក់ទាញភ្ញៀវទេសចរមកចូលទស្សនាឲ្យបានច្រើន ជម្រុញឲ្យមានការវិនិយោគលើវិស័យកសិកម្ម ខេត្តកំពង់ធំគឺមានសក្តានុពលខ្លាំង លើវិស័យទេសចរ និងវិស័យកសិកម្ម ដែលជាគោលដៅចាប់អារម្មណ៍សំខាន់ក្នុងការវិនិយោគរបស់ប្រទេសកូរ៉េ ។
ឯកឧត្តម បានវាយតម្លៃខ្ពស់ ចំពោះគណៈអភិបាលខេត្តកំពង់ធំ មន្ទីរ អង្គភាព មន្រ្តីរាជការ កងកម្លាំង ទាំងអស់ ដែលបានខិតខំប្រឹងប្រែង ដោះស្រាយរាល់បញ្ហាបទល្មើសព្រៃឈើ បទល្មើសនេសាទ និងទំនាស់ដីធ្លី រួមទាំងការដោះស្រាយបញ្ហានានា ទទួលបានលទ្ធផលជោគជ័យដោយអហឹង្សា ដែលជាការទទួលយកនូវការអប់រំបានល្អ ពីថ្នាក់ដឹកនាំ។
ឯកឧត្តម សុខលូ អភិបាលនៃគណៈអភិបាលខេត្តកំពង់ធំ បានលើកពីលទ្ធផលសន្និបាតរយះពេល២ថ្ងៃ ដែលសម្រេចបាន គឺ ឆ្នាំ២០១៨កន្លងទីនេះ រដ្ឋបាលខេត្តកំពង់ធំ បានអនុវត្តកម្មវិធី នយោបាយ និង យុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាលកម្ពុជានិតិកាលទី៥ ជាលទ្ធផលបានធ្វើឲ្យរដ្ឋបាលខេត្ត មន្ទីរអង្គភាពនានា កាន់តែមានប្រសិទ្ធភាព ក្នុងការផ្តល់សេវាជូនប្រជាពលរដ្ឋ ក៏ដូចជាការអភិវឌ្ឍន៍លើគ្រប់វិស័យ ដើម្បីកាត់បន្ថយភាពក្រីក្រ របស់ប្រជាពលរដ្ឋ ក្នុងភូមិសាស្រ្តខេត្តកំពង់ធំ ទន្ទឹមនេះ អាជ្ញារធរ កងកម្លាំង សមត្ថកិច្ច បានខិតខំប្រឹងប្រែង ធានាការពារដល់ដំណើរការបោះឆ្នោតជ្រើសតាំង សមាជិកព្រឹទ្ធសភានិតិកាលទី៤ និងការបោះឆ្នោតតំណាងរាស្រ្តនិតិកាលទី៦ ឲ្យប្រកបដោយសុវត្តិភាព គ្មានអំពើហឹង្សា និងគ្មានការគំរាមគំហែង ។
ឯកឧត្តម បានបន្តថា ដោយឡែកការបង្រ្កាបបទល្មើសនានា ដូចជា បទល្មើសនេសាទ បទល្មើសព្រៃឈើ មានការថយចុះជាបន្តបន្ទាប់ ចំពោះបញ្ហាទំនាស់ដីធ្លី មានលក្ខណៈទ្រង់ទ្រាយធំ ក៏បានខិតខំទប់ស្កាត់ មិនឲ្យមានការកើតឡើងថ្មី ហើយបន្តខិតខំដោះស្រាយបញ្ហាដែលសល់ រដ្ឋបាលខេត្តបានបំផុសចលនា ចូលរួមពីមូលដ្ឋាន ភូមិ ឃុំមានសុវត្តិភាព ដើម្បីរួមគ្នាការពារសន្តិសុខសណ្តាប់ធ្នាប់ សាធារណៈបានល្អ ដូចជាបទល្មើសព្រហ្មទណ្ទ គ្រឿងញៀន ល្បែងស៊ីសងគ្រប់ប្រភេទ បានថយចុះដែលបានផ្តើម ចេញពីចំនុច អនុវត្តគោលនយោបាយ ភូមិឃុំមានសុវត្តិភាព ដ៏ រហូតឃុំសង្កាត់ទាំង៨១ ជាប់ចំណាត់ថ្នាក់ល្អ៕ដោយ តេច ឆេង
