រាជធានីភ្នំពេញ ៖ តាមប្រភពព័ត៌មានគួរឲ្យភ្ញាក់ផ្អើលមួយឲ្យដឹងថា លោក គង់ បូរ៉ា អតីតតំណាងរាស្ត្រ អតីតគណបក្សសង្គ្រោះជាតិ បានដាក់ពាក្យស្នើសុំបម្រើការងារជាមន្ត្រីរា ជការ នៅក្រសួងកសិកម្ម រុក្ខាប្រមាញ់ និងនេសាទ។ ការដាក់ពាក្យស្នើសុំបំរើការងារនោះ ត្រូវបានធ្វើឡើងតាមរយះលោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម ។
យោងតាមលិខិតស្នើសុំទៅលោក វេង សាខុន រដ្ឋមន្ត្រីក្រសួងកសិកម្ម លោក គង់ បូរ៉ា បានគូសបញ្ជាក់ថា «ដោយខ្ញុំបាទទើបបានបញ្ចប់តួនាទីជាអ្នកតំណាងរាស្ត្រមណ្ឌលព្រៃវែង ចំនួន០២ នីតិកាល (អាណត្តិទី៤ និងទី៥) ហើយទើបរួចពីបម្រាមធ្វើនយោបាយកាលពីខែមករា ឆ្នាំ២០១៩ ថ្មីៗ ដូចនេះខ្ញុំបាទសូមគោរពស្នើសុំចូលបម្រើការងារជាមន្ត្រីរាជការនៃនាយកដ្ឋាន សុខភាពសត្វ និងសុខភាពសាធារណៈ បសុព្យាបាល ទៅតាមភាពអនុគ្រោះរបស់គោលនយោបាយរបស់រាជរដ្ឋាភិបាលសម្រាប់កាលៈទេសៈពិសេសនេះ»។
លោក គង់ បូរ៉ា អាយុ ៤៥ឆ្នាំ គឺជាកូនបង្កើតលោក គង់ គាំ ប្រធានកិត្តិយសគណបក្ស ឆន្ទៈខ្មែរ ហើយលោកក៏ជាអតីតតំណាងរាស្ត្រមកពីអតីតគណបក្សសង្គ្រោះជាតិ និង ត្រូវបានតុលាការ ហាមប្រាមមិនឲ្យធ្វើនយោបាយរយះពេល៥ឆ្នាំ ហើយទើបតែបានទទួលសិទ្ធិធ្វើនយោបាយឡើងវិញកាលពីពេលថ្មីៗនេះ ៕
