អន្តរជាតិ ៖ មេដឹកនាំបក្សប្រឆាំងរបស់វ៉េណេស៊ុយអេឡា លោក Juan Guaidó បានត្រលប់មកទីក្រុងការ៉ាកាស់ វិញហើយ ដោយស្វាគមន៍យ៉ាងកក់ក្តៅពីអ្នកគាំទ្ររបស់ខ្លួនរាប់ពាន់នាក់។ នេះបើយោងតាមប្រភពពី BBC ។
លោក Juan Guaidó កំពុងប្រឈមមុខនឹងការចាប់ខ្លួនដាក់ពន្ធនាគារពីសំណាក់អាជ្ញាធរនៃរបបដឹកនាំលោក Nicolás Maduro ដែល ចោទប្រកាន់លោកថាបានរំលោភលើបទបញ្ជារបស់តុលាការកំពូលដែលហាមលោកចាកចេញទៅក្រៅប្រទេស។
ថ្លែងនៅចំពោះមុខអ្នកគាំទ្រ លោក Guaidó បានលើកឡើង ដូច្នេះថា៖ «យើងបានត្រឡប់មកដល់វេណេស៊ុយអេឡាវិញ…ដូច្នេះយើងនឹងកាន់តែរឹងមាំលើសពេលណាៗទាំងអស់ ហើយយើង នឹងលុបបំបាត់រាល់ការគាបសង្កត់នៅក្នុងប្រទេសវេណេស៊ុយអេឡានាពេលឆាប់ៗនេះ។ ពួកគេមិនអាចបញ្ឈប់យើងបានឡើយ»។
ជាមួយគ្នានោះដែលសហរដ្ឋអាមេរិកក៏បានព្រមានរដ្ឋាភិបាលទីក្រុងការ៉ាកាស់ដែរថានឹងជួបផលវិបាកធ្ងន់ធ្ងរ បើហ៊ានចាប់ខ្លួនមេបក្ស ប្រឆាំងរូបនេះ៕
