កំពត ៖ បន្ទាប់ពីអាជ្ញាធរបានប្រើវិធានផ្សព្វផ្សាយអប់រំ និងជូនដំណឹងជាញឹកញយពាក់ព័ន្ធនឹងការបំពានកាន់កាប់ទ្រព្យសម្បត្តិសាធារណៈរបស់រដ្ឋ តែពុំទទួលបានលទ្ធផលដូចការរំពឹងទុក នៅព្រឹកថ្ងៃទី៤ ខែមិនា ឆ្នាំ២០១៩នេះ អាជ្ញាធរក្រុងកំពត បានប្រើធម៌ក្តៅដោយចុះរុះរើសំណង់រឹង លើផ្ទៃព្រែកស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ បំណងទប់ស្កាត់កុំឱ្យបទល្មើសកើតមានបន្ត និងដើម្បីសោភ័ណភាពទីក្រុង។
អភិបាលក្រុងកំពតបានប្រាប់អ្នកសារព័ត៌មានថា កន្លងទៅ អាជ្ញាធរក្រុងបានណែនាំដល់មេភូមិ ចៅសង្កាត់ឱ្យជម្រាបម្ចាស់សំណង់បញ្ឈប់សកម្មភាពសាងសង់ល្មើសច្បាប់ និងបំពានដីចំណីព្រែក ហើយអាជ្ញាធរក្រុងក៏បានធ្វើសេចក្តីជូនដំណឹងពីរបីលើករួចមកហើយដែរ ប៉ុន្តែពួកគាត់ហាក់ដូចជាមិនស្តាប់សោះ។
លោកអភិបាលក្រុងថា ការមករុះរើនៅថ្ងៃនេះជាគំរូមួយដើម្បីផ្ញើសារដល់បងប្អូនម្ចាស់សំណង់អនាធិបតេយ្យទាំងអស់ ហើយអាជ្ញាធរនឹងបន្តធ្វើនៅគ្រប់កន្លែង។ ដូច្នេះ សូមបងប្អូនមេត្តារុះរើដោយខ្លួនឯង ជៀសវាងពេលសមត្ថកិច្ចចម្រុះចុះមកចាត់ការនាំឱ្យខាតបង់ទ្រព្យសម្ភារះផ្សេងៗ ។
យ៉ាងណាក៏ដោយ ប្រជាពលរដ្ឋហាក់មិនសប្បាយចិត្តចំពោះវិធានការនោះទេ ដោយពួកគាត់លើកឡើងថា តាមពិតប្រជាជនមិនសូវដឹងទេ ដូច្នេះចង់ឱ្យអាជ្ញាធរមកកំណត់ថាអាចធ្វើត្រឹមណាបាន ជៀសវាងពេលធ្វើហើយ បែរជារដ្ឋចុះមកវាយចោលវិញនាំឱ្យខាតបង់នោះ។ ពលរដ្ឋបានបន្តថា ពិតណាស់ ការមកវាយឬរុះរើនេះ គឺអាជ្ញាធរចង់ឱ្យនៅតាមបណ្តោយព្រែកស្អាត ហើយក្នុងនាមប្រជាពលរដ្ឋលោកក៏ត្រូវការសោភ័ណភាពក្រុងស្រស់ស្អាតដែរ។ ប៉ុន្តែបើរុះរើសូមឱ្យធ្វើចំពោះអ្នករំលោភបំពានទាំងអស់គ្នា ដើម្បីឱ្យផ្នែកខាងក្រោយផ្ទះមានខឿនស្មើគ្នាផងដែរ ៕
