ខេត្ដបាត់ដំបង ៖ បទល្មើសនេសាទ បណរ៉ាវជាច្រើនខ្សែ ក្នុងឡូត៏២ និងឡូ៤ កំពុងមានសកម្មភាពពេញបន្ទុក ដោយសមត្ថកិច្ចបិទភ្នែកមិនធ្វើការបង្ក្រាប នៅតំបន់ព្រែកទាល់ ស្រុកឯកភ្នំ និងភូមិ ក្រោយឃុំតាប៉ុន ស្រុកសង្កែ បណ្តាលឲ្យហិនហោចពូជត្រីអស់ ។
តាមការ ឱ្យដឹងរបស់ប្រជានេសាទដាក់មងសន្ទូចនៅចុងខែវិច្ឆិកា ឆ្នាំ២០១៤បញ្ជាក់ថាអ្នកប្រព្រឹត្តល្មើសនេសាទនៅចំណុចអូរវាយជះតំបន់ ព្រែក ទាល់ ស្រុកឯកភ្នំមាន បុគ្គលបីនាក់ជាយោធាបានដើរប្រមូល ប្រាក់ពីបទល្មើសនេសាទក្នុងមួយឈ្មោះ១លាន៥សែនរៀល។
ចំណែកនៅចំណុចភូមិ ក្រោយ ឃុំតាប៉ុន និងព្រៃរនាម ឃុំរកាឃុំកំពង់ព្រះឃុំកំពង់ព្រៀង ស្រុកសង្កែមានអ្នកប្រព្រឹត្ដបទល្មើស ដាក់បណរ៉ាវជាច្រើននាក់ ។ អ្នកទាំងនេះសុទ្ធតែបាន បង់ប្រាក់ជូនសមត្ថកិច្ចជំនាញ ។ ពួកគេ ប្រព្រឹត្ដបទល្មើសតាំងពីរដូវវស្សារហូតដល់រដូវសម្រកតែគ្មាន សមត្ថកិច្ចណា បង្ក្រាបឡើយ ។
លោក សំ ចន្ថា អភិបាលរងស្រុកសង្កែ និងលោក ឡេង សុវណ្ណារ៉ា នាយជលផល ស្រុកសង្កែដែលដឹកនាំកម្លាំងចុះបង្ក្រាបតែងតែមើលរំលងចំណុចបទល្មើស ខាងលើនេះ ។
ពាក់ព័ន្ធ ករណីនេះ អ្នកយកព័ត៌មានមិនអាចទាក់ទងពីលោក សំ ចន្ថា អភិបាលរងស្រុកសង្កែ និងលោក ឡេង សុវណ្ណារ៉ា នាយជលផល ស្រុកសង្កែបានទេ ។ រីឯលោក ជួង សុភា នាយខណ្ឌជលផលខេត្ដបាត់ដំបងអ្នកយកព័ត៌មានទូរស័ព្ទចូលជាច្រើនដងតែ មិនមានអ្នកទទួល ៕
