ភ្នំពេញ ៖ លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ អភិបាលរងខេត្តព្រះសីហនុទាំង២រូប នៅថ្ងៃទី០១ ខែមីនា ឆ្នាំ២០១៩ បានបាត់បងមុខតំណែងហើយ តាមរយៈអនុក្រឹត្យ ចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រី ដែលកាលពីថ្ងៃទី២៨ ខែកុម្ភៈ បានសន្យានៅក្នុងកិច្ចប្រជុំជាមួយសមាជិកគណកម្មាធិការពិគ្រោះនិងផ្តល់យោបល់ នៅវិមានសន្តិភាព។ រាជរដ្ឋាភិបាលកម្ពុជា នៅថ្ងៃទី០១ ខែមីនា ឆ្នាំ២០១៩នេះ បានសម្រេចដកមុខតំណែង អភិបាលរងខេត្តព្រះសីហនុ ២រូប គឺលោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ខណៈដែលអតីតអភិបាលរងទាំង២រូបនេះ ត្រូវបានគេមើលឃើញថា បានពាក់ព័ន្ធទៅនឹងការបង្ក្រាបដ៏សាហាវ ទៅលើប្រជាពលរដ្ឋក្នុងទំនាស់ដីធ្លីក្នុងខេត្តឆ្នេរសមុទ្រមួយនេះ ។
សម្តេចនាយករដ្ឋមន្ត្រី ហ៊ុន សែន បានសរសេរនៅលើបណ្តាញសង្គមរបស់សម្តេចនៅមុននេះបន្តិចដែលបញ្ជាក់ថា សម្តេចសូមប្រគល់ការងារបន្ដឲ្យអង្គភាពប្រឆាំងអំពើពុករលួយ និងក្រសួងមហាផ្ទៃ ជុំវិញករណីអភិបាលរងខេត្តព្រះសីហនុទាំង២រូប ក្រោយពីសម្ដេចបានដកហូតតំណែងកាលពីព្រឹកម៉ិញ។
សម្ដេចតេជោ ហ៊ុន សែន បានសរសេរថា «សូមបញ្ជាក់ជូនថា ខ្ញុំបានប្រើអំណាចខ្ញុំ ដើម្បីដកចេញពីតំណែងហើយ ឯការងារបន្ដ គឺជាភារកិច្ចរបស់អង្គភាពប្រឆាំងអំពើពុករលួយ និងក្រសួងមហាផ្ទៃ»។
សម្ដេច ហ៊ុន សែន បានបន្តទៀតថា «ថ្ងៃនេះខ្ញុំបង្ខំចិត្តអនុវត្តន៍អភិក្រមទី៥ គឺការវះកាត់ដោយដកអភិបាលរងខេត្តព្រះសីហនុ ពីររូបចេញពីតំណែង។ ខ្ញុំត្រូវតែយកគ្រាប់គ្រួស និងខ្សាច់ចេញពីស្បែកជើង ទើបអាចដើរទៅមុខទៀតបាន។ ខ្ញុំគ្មានពេលនិយាយច្រើនជាមួយមន្ត្រីខិលខូចទៀតទេ ព្រោះខ្ញុំបានអប់រំពួកគេច្រើនហើយ។ ដល់ពេលនេះ ខ្លាក៏ត្រូវវាយ ពស់ក៏ត្រូវវាយ កណ្តុរក៏ត្រូវវាយ រុយក៏ត្រូវវាយ ឲ្យតែបំពានលើផលប្រយោជន៍ប្រជាជន ។
មូលហេតុការដកតំណែងភ្លាមៗ គឺពាក់ពន្ធ័និងការចេញមុខដឹកនាំកម្លាំងប្រដាប់អាវុធ ប្រើហឹង្សាអនុវត្តន៍សាលក្រមដកយកដីពីប្រជាពលរដ្ឋនៅខេត្តព្រះសីហនុកាលពីពេលថ្មីៗនេះ។
ទន្ទឹមនិងនោះប្រជាពលរដ្ឋឆ្ងល់ថា តើអភិបាលខេត្តរងទាំងពីរគ្រឿងហ្នឹងលួចធ្វើការអត់ឆ្លងយោបល់លោក យន់្ត មីន ជាអភិបាលខេត្តទេឬ? បានជារកឃើញកំហុសតែពីរនាក់ចឹង។ ព្រោះបើគ្មានការឯកភាពពីប្រធានគណបញ្ជាការឯកភាពខេត្តតើលោក ស្រ៊ុន ស្រ៊ន និងលោក ផៃ ប៊ុនវណ្ណៈ អាចប្រើកម្លាំងប្រដាប់អាវុធចំរុះទាហ៊ាន ប៉េអឹម ប៉ូលិសបានដែរទេ?។
សូមបញ្ជាក់ថាលោកមេបញ្ជាការយោធាសឹករងខេត្តព្រះសីហនុ ក៏ជាមុខសញ្ញាត្រូវដេញចោលដែរក្នុងរឿងនេះ តែសេចក្តីសម្រេចចេញត្រឹមរដ្ឋមន្ត្រីក្រសួងការពារជាតិតែប៉ុណ្ណោះ។
ដោយឡែកនៅថ្ងៃទី១ ខែមិនានេះដែរ សារព័ត៌មានបានដកស្រង់សំដីលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ មកផ្សាយថា ៖ សម្តេចពិជ័យសេនា ទៀ បាញ់ បានចេញបទបញ្ជាយ៉ាងដាច់ខាតមួយ មិនឱ្យមេបញ្ជាការគ្រប់ជាន់ថ្នាក់ បញ្ជាការកងទ័ព ចូលរួមសកម្មភាពទំនាស់ដីធ្លីរបស់ប្រជាពលរដ្ឋឡើយ ព្រោះវាមិនស្របតាមច្បាប់លក្ខន្តិកៈរបស់កងយោធពលខេមរភូមិន្ទ ។
លោកថា ការចូលរួមសកម្មភាព ពាក់ព័ន្ធនឹងទំនាស់ដីធ្លីនេះ មានតែមន្ត្រីយុត្តិធម៌ ក្នុងកងរាជអាវុធហត្ថតែប៉ុណ្ណោះ ៕
