ខេត្តកំពង់ធំ ៖ ចោរជើងឆើតជំនាញខាងលួចរថយន្តមួយរូប ត្រូវអស់លក្ខណ៍ក្រោយពីលួចបានរថយន្តសេរីទំនើបមួយ គ្រឿង ពីក្រុងស្ទឹងសែន បើកចូលរាជធានីភ្នំពេញ ត្រូវបានកម្លាំងកងរាជអាវុធហត្ថស្រុកបារាយណ៍ ខេត្តកំពង់ធំ ដេញស្ទាក់ចាប់បាននៅលើដងផ្លូវជាតិលេខ ៦ ។
ដោយទទួលបានបទបញ្ជាពីមេបញ្ជាការកងរាជអាវុធហត្ថខេត្តកំពង់ធំ លោកវរសេនីយ៍ត្រី ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ បានដឹកនាំកម្លាំងចេញប្រតិបត្តិការចុះបង្ក្រាបភ្លាមតាមបណ្តោយ ផ្លូវជាតិលេខ ៦ ប្រដេញស្ទាក់ចាប់បានចោរលួចរថយន្តលិចស៊ីស សេរី ០១០ ពណ៌ខ្មៅ ពាក់ស្លាកលេខ ភ្នំពេញ 2F-9275 ដោយស្ទាក់ឃាត់ចាប់រថយន្ត និងជនសង្ស័យនៅចំណុចភូមិរពាក់ពេន ឃុំទ្រាល ស្រុកបារាយណ៍ ខេត្តកំពង់ធំ នៅវេលាម៉ោង ១៣ និង២០នាទី ថ្ងៃទី ០៧ ខែវិច្ឆិកា ឆ្នាំ២០១៤ ។
ជនសង្ស័យដែលជាចោរលួចរថយន្តឈ្មោះ ឌី សុខេន ភេទប្រុស អាយុ ២១ ឆ្នាំ រស់នៅភូមិថ្នល់កែង ឃុំរវៀង ស្រុករវៀង ខេត្តព្រះវិហារ រីឯម្ចាស់រថយន្តឈ្មោះ សួង បុរី ភេទប្រុស អាយុ ២៩ឆ្នាំ រស់នៅភូមិទី ៦ សង្កាត់កំពង់ធំ ក្រុងស្ទឹងសែន ខេត្តកំពង់ធំជាម្ចាស់ភោជនីយដ្ឋានអរុណរះដ៏ល្បី ។
តាមមន្ត្រីអ.ហបានឱ្យដឹងថា ម្ចាស់រថយន្តបានចតរថយន្តនៅមុខវត្តកំពង់ធំ ដោយមានធុរៈផ្ទាល់ខ្លួន ឆ្លៀតឱកាសនោះ ជនសង្ស័យក៏លួចរថយន្តរួចបើកតាមផ្លូវជាតិលេខ ៦ សំដៅចូលទីក្រុងភ្នំពេញ ចំណែកម្ចាស់ រថយន្តក្រោយពីបាត់រថយន្តក៏ប្តឹងសមត្ថកិច្ច ចំណែកឯមេបញ្ជាការអ.ហខេត្តកំពង់ធំ ក៏បានបញ្ជាកងកម្លាំង អ.ហ នៅតាមដងផ្លូវជាតិលេខ ៦ ឱ្យចេញប្រតិបត្តិការតាមរករថយន្ត ទើបកម្លាំងអ.ហស្រុកបារាយណ៍ ដែលតែងតែ មានសកម្មភាពទាន់ពេលវេលា ចេញប្រតិបត្តិការចាប់បានជនសង្ស័យ និងរថយន្តបញ្ជូនទៅថ្នាក់លើចាត់ ការតាមនីតិវិធីច្បាប់ ។
ប្រជាពលរដ្ឋបានចាប់អារម្មណ៍ចំពោះការខិតខំប្រឹងប្រែងរបស់លោកវរៈសេនីយ៍ត្រី ឃុន ប៊ុនហួរ ក្នុងការទប់ស្កាត់រាល់សកម្មភាពច្បាប់ដែលថ្នាក់លើចេញបទបញ្ជារហូតទទួលបានជោគជ័យជាបន្តបន្ទាប់ ៕
ដោយ ៖ តេច ឆេង
