ខេត្តរតនគិរី ៖ នៅព្រឹកថ្ងៃទី២៤ ខែកុម្ភៈ ឆ្នាំ២០១៩ ប្រជាពលរដ្ឋខេត្តរតនគីរីបានសម្តែងការគាំទ្រដល់លោកឧត្តមសេនីយ៍ទោ យិន ចំណាន ស្នងការ នៃស្នងការដ្ឋាននគរបាលខេត្តរតនគិរី ក្រោយពីទទួលបានព័ត៌មានថា មានកន្លែងលួចលាក់បើកលេងល្បែង ស៊ីសង បៀ អាប៉ោង យូគី និងមាន់សង្វៀនជល់មាន់ខុសច្បាប់់ លោកស្នងការថ្មីបានបញ្ជាឲ្យលោក ផែន ឌីណាស្នងការរងនគរបាលព្រហ្មទណ្ឌកម្រិតធ្ងន់ ដឹកនាំកម្លាំងចុះបង្ក្រាបភ្លាមៗដោយជោគជ័យ ដោយធ្វើការរុះរើបំផ្លាញទីតាំងលួចលាក់ជល់មាន់ចោលនិងរឹបអូសសម្ភារៈបំរើឲ្យការជល់មាន់មួយចំនួនផងដែរ។
ប្រជាពលរដ្ឋមានការព្រួយបារម្មណ៍ ហើយពួកគាត់បានត្អូញត្អែអំពីសន្តិសុខនិងសុវត្ថភាពផ្ទាល់ខ្លួននិងក្នុងគ្រួសារពាក់ព័ន្ឋ ទៅនឹងចោរលួច ឆក់ ប្លន់ ដែលកើតមានជាបន្តបន្ទាប់ ជាក់ស្តែងគ្រាន់តែនៅក្នុងខែកុម្ភៈនេះ ចោរលួចគាស់ផ្ទះយកសម្ភារៈ ២ករណីមកហើយ លើកទី១គាស់ផ្ទះទាំងកណ្តាលថ្ងៃនៅភូមិមួយតាស៊ុយ សង្កាត់កាចាញ ក្រុងបានលុង មិនមានបាត់បង់សម្ភារៈទេ ព្រោះម្ចាស់មិនបានទុកលុយនិងរបស់មានតម្លៃនៅក្នុងផ្ទះ និងយប់ថ្ងៃទី២៣ ខែកុម្ភៈ ឆ្នាំ២០១៩នេះ ក្រុមចោរលួចបានគាស់ផ្ទះប្រជាពលរដ្ឋមានឈ្មោះ រ៉ូត សារុន បើកវីងវេរលុយនិងទិញចន្ទីនៅចំណុចផ្លូវចូលឃុំតឺន ស្ថិតក្នុងឃុំតាអង ស្រុកកូនមុំ ដោយក្រុមចោរយកលុយអស់ចំនួន ២៧០០០០០០រ(ម្ភៃប្រាំពីលានរៀល) កាតគ្រីម៉ូតូ ឯកសាររថយន្ត និងទូរស័ព្ទដៃមួយគ្រឿង។
គួរបញ្ជាក់ផងដែរថា ល្បែងលួចលាក់ជល់មាន់តាមព្រៃ តាមចំការស្វាយចន្ទី ល្បែងចាក់បាល់ និងល្បែងកន្ទុយលេខកើតឡើងព្រោងព្រាត កំពុងតែពេញនិយមនៅក្រុងបានលុង ខេត្តរតនគិរី ហើយប្រជាពលរដ្ឋកំពុងរង់ចាំមើលស្នាដៃលោកស្នងការថ្មី ក្នុងការបង្រ្កាបល្បែងស៊ីសង រក្សាសន្តិសុខសណ្តាប់ធ្នាប់ជូនប្រជាពលរដ្ឋ៕
