ខេត្តព្រះវិហារ ៖ ប្រភពពីប្រជាពលរដ្ឋរស់នៅភូមិត្រពាំងទន្ទឹម ឃុំរម្យទម ស្រុករវៀង ខេត្តព្រះវិហារ បានឲ្យដឹងថា បច្ចុប្បន្នមានក្រុមហ៊ុនជាច្រើន កំពុងធ្វើអាជីវកម្មរ៉ែមាសខុសច្បាប់ក្នុងតំបន់ភ្នំលុង យ៉ាងពេញបន្ទុកដោយគ្មានញញើតនឹងផ្លូវច្បាប់អ្វីទាំងអស់ ធ្វើឲ្យធនធានរ៉ែមាសត្រូវប្រឈមនឹងសេចក្ដីវិនាសយ៉ាងឆាប់រហ័ស។ ចំណែកលោក អ៊ុន ចាន់ដា អភិបាលខេត្តព្រះវិហារ ព្រមទាំងប្រធានមន្ទីររ៉ែនិងថាមពលខេត្តព្រះវិហារ បានរក្សាភាពស្ងៀមស្ងាត់ទុកឲ្យក្រុមហ៊ុនទាំងនោះធ្វើអាជីវកម្មរ៉ែមាសខុសច្បាប់យ៉ាងគឃ្លើន ជាងនេះទៅទៀតប្រជាពលរដ្ឋបានលើកឡើងថា ការបង្ក្រាបរបស់សមត្ថកិច្ចពាក់ព័ន្ធនាពេលកន្លងមក បានត្រឹមតែធ្វើឲ្យល្អមើលប៉ុណ្ណោះ ព្រោះក្រុមហ៊ុនធំៗដែលមានម្ចាស់ជាសែស្រឡាយមន្ត្រីជាន់ខ្ពស់ គឺគ្មានសមត្ថកិច្ចណាហ៊ានប៉ះពាល់រើមជើងពួកគេនោះទេ។
-មន្ត្រីអង្គការសង្គមស៉ីវិលក្រៅរដ្ឋាភិបាល និងប្រជាពលរដ្ឋក្នុងឃុំរម្យទម បានឲ្យដឹងថា ករណីសមត្ថកិច្ចបង្ក្រាបអាជីវកម្មរ៉ែមាសនៅតំបន់ភ្នំលុង កាលពីពេលថ្មីៗនេះគឺជារឿងឥតន័យព្រោះសមត្ថកិច្ចមិនបានអនុវត្តន៍ប្រកបដោយគ្មានតម្លាភាពនោះឡើយ។
ប្រភពប្រជាពលរដ្ឋដដែលបានលើកឡើងថា ក្រុមហ៊ុនធំៗដែលមានខ្នងបង្អែកជាមន្ត្រីជាន់ខ្ពស់ក្នុងជួររាជរដ្ឋាភិបាល និងមានខ្នងបង្អែកជាមន្ត្រីយោធាជាន់ខ្ពស់ដែលពាក់ព័ន្ធនៅពីក្រោយខ្នង ទើបមន្ត្រីជំនាញនិងសមត្ថកិច្ចពាក់ព័ន្ធមិនហ៊ានប៉ះពាល់ឡើយ។
មន្ត្រីអង្គការក្រៅរដ្ឋាភិបាល បានបញ្ជាក់ថា ថ្មីៗនេះសមត្ថកិច្ចបង្ក្រាបទីតាំងអាជីវកម្មរ៉ែមាស២កន្លែងដែលធ្វើអាជីវកម្មខុសច្បាប់៤ឆ្នាំមកហើយ ប៉ុន្តែម្ចាស់ទីតាំងអាជីវកម្មរ៉ែមាសទាំងនោះអាចគេចផុតពីសំណាញ់ច្បាប់យ៉ាងយ៉ាងសុខស្រួល។ មន្ត្រីអង្គការក្រៅរដ្ឋាភិបាល បានកត់សម្គាល់ទៀតថា ទីតាំងអាជីវកម្មរ៉ែមាសដែលម្ចាស់មានខ្នងបង្អែករឹងមាំគឺអាចចៀសផុតពីការបង្ក្រាបជារៀងរហូត។
ប្រភពពីមន្ត្រីអាជ្ញាធរក្នុងឃុំរម្យទម ស្រុករវៀង ខេត្តព្រះវិហារ បានបង្ហើបឲ្យដឹងថា ក្រុមហ៊ុនធំៗដែលមានម្ចាស់ជាឧកញា និងលោកជំទាវ មានខ្នងបង្អែករឹងមាំកំពុងបន្តធ្វើអាជីវកម្មរ៉ែមាសខុសច្បាប់នៅក្នុងតំបន់ភ្នំលុង យ៉ាងរាលដាលដោយគ្មានញញើតអ្វីទាំងអស់ព្រោះគេបានរៀបចំជាប្រព័ន្ធរួចហើយ។
ប្រភពខ្លះបានឲ្យដឹងថា ប្រសិនបើគ្មានការឃុបឃិតបើកដៃពីសំណាក់អាជ្ញាធរ ទេនោះគឺគ្មានឈ្មួញណា ក្រុមហ៊ុនណា ហ៊ានធ្វើអាជីវកម្មរ៉ែមាសខុសច្បាប់ក្នុងតំបន់ភ្នំលុង យ៉ាងមហន្តរាយដូចសព្វថ្ងៃនេះឡើយ។ ដូច្នេះលោក ស៊ុយ សែម រដ្ឋមន្ត្រីក្រសួងរ៉ែនិងថាមពល គួរពិនិត្យមើលឡើងវិញទៅលើភាពអសកម្មនិងអំពើពុករលួយរបស់ប្រធានមន្ទីររ៉ែនិងថាមពលខេត្តព្រះវិហារ ផងដែរដើម្បីកុំឲ្យធ្វើអ្វីៗស្រេចតែអំពើចិត្តតទៅទៀត ក្នុងខណៈដែលរ៉ែមាសនៅតំបន់ភ្នំលុង កំពុងប្រឈមនឹងសេចក្ដីវិនាស។ ជាពិសេសករណីឈ្មួញធំៗអាងមានខ្នងបង្អែកជាមន្ត្រីយោធាជាន់ខ្ពស់ហើយធ្វើអាជីវកម្មរ៉ែមាសខុសច្បាប់នៅតំបន់ភ្នំលុង គឺជារឿងដែលថ្នាក់ដឹកនាំក្រសួងការពារជាតិ គួរពិនិត្យឡើងវិញផងដែរដើម្បីកុំឲ្យប៉ះពាល់ដល់កេរ្តិ៍ឈ្មោះស្ថាប័នយោធាទូទាំងប្រទេស។
យើងពុំអាចសុំការបំភ្លឺពីលោកអភិបាលខេត្តបានទេ ព្រោះពុំមានលេខទូរសព្ទ័តែនិងព្យាយាមសុំការពន្យល់នៅពេលក្រោយ៕
