រាជធានីភ្នំពេញ ៖ កម្លាំងអាជ្ញាធរ និងសមត្ថកិច្ចជាច្រើននាក់ នៅយប់រំលងអាធ្រាត្រចូលថ្ងៃទី២៣ ខែកុម្ភៈ ឆ្នាំ២០១៩ បាន បើកប្រតិបត្តិការទ្រង់ទ្រាយធំ បង្ក្រាបករណីគ្រឿងញៀននិងឃាត់ខ្លួនបុគ្គលិកនិងអ្នកពាក់ព័ន្ធមួយចំនួន
ព្រមទាំងដកហូតថ្នាំញៀនមួយចំនួនផងដែរនៅក្លឹបកំសាន្តរ៉ុក របស់ឧកញ៉ា គិត ធាង បងឧកញ៉ា គិត ម៉េង។
ប្រតិបត្តិការទាំងកណ្ដាលរាត្រីនេះ មានការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ ដឹកនាំបញ្ជាកម្លាំងផ្ទាល់ដោយ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ព្រមទាំងកម្លាំងអាជ្ញាធរ និងនគរបាលរាប់សិបនាក់ផ្សេងទៀត។
ព្រឹកថ្ងៃទី២៣ ខែកុម្ភៈ ឆ្នាំ២០១៩ លោកវរសេនីយ៍ឯក ប៊ុន សត្យា នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា មនុស្សដែលត្រូវបានឃាត់ខ្លួនជាបណ្ដោះអាសន្ន មានចំនួន៣១២នាក់ ដែលជាបុគ្គលិកនិងអ្នកពាក់ព័ន្ធ។ បច្ចុប្បន្នមនុស្សដែលឃាត់ខ្លួន ត្រូវបានយកទៅសាកសួរបន្ដទៀត នៅស្នងការដ្ឋាននគរបាលរាជធានីភ្នំពេញ រួមជាមួយវត្ថុតាងពាក់ព័ន្ធផងដែរ។
ទន្ទឹមនោះដែរនៅថ្ងៃទី ២៣ ខែកុម្ភៈ ឆ្នាំ២០១៩ រដ្ឋបាលសាលារាជធានីក្រោមបញ្ជាររបស់លោក ឃួង ស្រេង បានចេញសេចក្តីសំរេចមួយបិទទាំងស្រុង មជ្ឈមណ្ឌលកំសាន្តរ៉ុក ដែលមានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន។
ការប្រកាសបិទក្លឹបរបស់ឧកញ៉ាគិតធៀងដែលកន្លងមកមិនសូវមានសមត្តកិច្ចណាហ៊ានប៉ះពាល់ គឺក្រោយពីសមត្ថកិច្ចនគរបាលរាជធានីដឹកនាំបញ្ជារផ្ទាល់ពីលោកឧត្តមសេនីយ៍ឯក ស ថេត ចុះបង្ក្រាបករណីគ្រឿងញៀនទ្រង់ទ្រាយធំ កាលពីរំលងអធ្រាតចូលព្រឹកថ្ងៃទី២៣កុម្ភៈ ។
លោក ស ថេត បានឲ្យដឹងតាមហ្វេសប៊ុកថា ៖ ខ្ញុំ និងស្នងការរងជាច្រើនរូប ព្រមទាំងកម្លាំងជំនាញចម្រុះ បានចុះបង្ក្រាបគ្រឿងញៀនទ្រង់ទ្រាយធំដោយផ្ទាល់នៅមជ្ឈមណ្ឌលកម្សាន្តរ៉ុក ដោយឃាត់ខ្លួនអ្នកប្រើប្រាស់ និងអ្នកចែកចាយជាង៣០០នាក់ ក្នុងនោះមានជនជាតិចិន១៤នាក់ ហើយដកហូតបានគ្រឿងញៀនជាង៣៩គីឡូក្រាម និងសារធាតុញៀនជាទឹក៩គីឡូ២ខាំ ជញ្ជីងថ្លឺងគ្រឿងញៀន ១២ និងកាំភ្លើងខ្លី១ដើម។
គ្មានអ្នកណារត់រួចមួយ ត្រូវបានគេរៀបចំផែនការយ៉ាងលំអិត មិនបែកធ្លាយព័ត៌មានទេ ។
ជាការកត់សម្គាល់ ក្នុងពេលបើកប្រតិបត្តិការបង្ក្រាប សមត្ថកិច្ចមិនអនុញាតអោយអ្នកសារព័ត៌មានណាម្នាក់ចូលទៅក្នុងរង្វង់ប្រតិបត្តិការនោះឡើយ។បន្ទាប់មកបានគេឃើញមានមន្ត្រីជាន់ខ្ពស់នៃអាជ្ញាធរគ្រឿងញៀនមានលោកនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរប្រឆាំងគ្រឿងញៀន លោកនាយឧត្តមសេនីយ៍ ម៉ក ជីតូ អគ្គស្នងការរងនគរបាលជាតិ បានមានវត្តមានមកសង្កេតផងដែរ។
មតិសាធារណៈសួរថា តើលោកឧកញ៉ាគិតធាងនឹងត្រូវទទួលទោសកំរឹតណាដែររឺទេ? រឺមួយជាប់តែកណ្តុរក្រឡាត តែបើដំរីស្តវិញដាក់មិនជាប់ បើមកដល់ពេលនេះគេនៅមិនទាន់ឃើញអស់លោកមានសមត្តកិច្ចណាម្នាក់ហៅឧកញ៉ាគិតធាងសួរនាំអីផងហ្នឹង?។ចាំមើលមើលព្រោះសាលាក្រុងថា សមត្តកិច្ចនឹងស្រាវជ្រាវរកមេខ្ឡោងអ្នកនាំចូលគ្រឿងញៀនទៀត៕
