ខេត្តឧត្តរមានជ័យ ៖ មុខរបរដុតធ្យូងរបស់ប្រជាពលរដ្ឋជាង៣០កន្លែង នៅខាងក្នុង និងក្រៅតំបន់ដែនជម្រកសត្វព្រៃសង្ឃរុក្ខវ័ន្ត និងរតនៈរុក្ខា ដែលស្ថិតនៅក្នុងភូមិកូនដំរី សង្កាត់សំរោង ក្រុងសំរោង ត្រូវបានមន្ត្រីបរិស្ថាន និងតំណាងសហគមន៍បានសម្រេចឲ្យបញ្ឈប់។ ការផ្អាកសកម្មភាពអាជីវកម្មនោះ គីធ្វើតាមតាមរយះកិច្ចសន្យាឲ្យម្ចាស់អាជីវកម្មបញ្ឈប់តែម្តង ក្រោយពីបានណែនាំជាច្រើនដងមកហើយ ។
ម្ចាស់អាជីវកម្មដុតធ្យូងនេះ បានបើកអាជីវកម្មតាំងពីចុងឆ្នាំ២០១៧ ដោយអាជ្ញាធរបានចុះទៅណែនាំពួកគាត់ជាច្រើនលើកមកហើយ ប៉ុន្ដែពួកគាត់មិនបានបញ្ឈប់តាមការណែនាំទេ ទើបសមត្ថកិច្ចចុះទៅធ្វើកិច្ចសន្យាផ្ទាល់តែម្ដងកាលពីថ្ងៃអាទិត្យកន្លងទៅ ។
ម្ចាស់អាជីវកម្មទាំងនោះភាគច្រើន គឺជាអ្នកចំណាកស្រុកពីតំបន់ផ្សេងៗ ហើយមកប្រកបមុខរបរនៅទីនេះជាង ១ឆ្នាំមកហើយ ដោយពួកគាត់បានចូលទៅកាប់ឈើពីក្នុងព្រៃសង្ឃរុក្ខវ័ន្ដ និងព្រៃរតនៈរុក្ខាមកដុត ដើម្បីយកធ្យូងទៅលក់សម្រាប់ជាមុខរបរប្រចាំថ្ងៃរបស់ពួកគាត់។
សូមជម្រាបថា សហគមន៍ព្រៃឈើសង្ឃរុក្ខវ័ន្ត លាតសន្ធឹងលើផ្ទៃដីចំនួន ៣ ស្រុករួមមាន ក្រុងសំរោង ស្រុកចុងកាល់ និងស្រុកអន្លង់វែង មានផ្ទៃដីជាង ១៨ ២៦១ ហិកតា ក្នុងនោះព្រៃឈើប្រមាណ ៦ ពាន់ហិកតា ត្រូវលិចទឹកងាប់ដើមឈើ ស្ថិតនៅសង្កាត់កូនក្រៀល ក្រុងសំរោង ដែលបានចុះបញ្ជីជាព្រៃអភិរក្សនៅថ្ងៃទី ៤ ខែឧសភា ឆ្នាំ ២០០៩កន្លងទៅ។ចំណែកព្រៃសហគមន៍រតនៈរុក្ខា មានផ្ទៃដីចំនួន ១២ ៨៧២ ហិកតា ស្ថិតនៅក្នុងសង្កាត់កូនក្រៀល ក្រុងសំរោង បានចុះបញ្ជីក្នុងថ្ងៃជាមួយគ្នាផងដែរ ៕
