ខេត្តកំពង់ធំ ៖ សកម្មភាពការពារល្បាតរបស់មន្រ្តីឧទ្យានុរក្ស ដែនជម្រកសត្វព្រៃព្រៃឡង់ គឺត្រូវបានធ្វើសកម្មភាពយ៉ាងសកម្ម ក្នុងតួនាទីការពារអភិរក្សធនធានធម្មជាតិ រួមទាំងបានទប់ស្កាត់បង្រ្កាបការលបលួចអាឈើ និងរុករានព្រៃឈើយកធ្វើជាកម្មសិទ្ធ នៅក្នុងដែនជម្រកសត្វព្រៃព្រៃឡង់ ក្រោមការបញ្ជារផ្ទាល់របស់លោក តុប កក្កដា ប្រធានមន្ទីរបរិស្ថានខេត្តកំពង់ធំ។
ទីតាំងលបលួចតំឡើងម៉ាស៊ីន អារជ្រៀកឈើមួយកន្លែងនៅតំបន់ស្ទឹងតូច ចំនុច UTM 553518-
1432832 ស្ថិតនៅជាប់សហគមន៍ ហុងចំតិត ដែលគ្រប់គ្រងដោយរដ្ឋបាលព្រៃឈើ ដែលមានចំងាយជាងមួយគីឡូម៉ែត្រពីច្រករបៀង ស្ថិតក្នុងឃុំមានរិទ្ធ ស្រុកសណ្តាន់ ខេត្តកំពង់ធំ ត្រូវបានដឹកនាំបង្រ្កាបដោយលោក តុប កក្កដា ប្រធានមន្ទីរបរិស្ថានខេត្តកំពង់ធំ។
សកម្មភាពបង្រ្កាប និងទប់ស្កាត់ការអារជ្រៀកឈើដោយខុសច្បាប់ ត្រូវបានមន្ត្រីប្រចាំការច្រករបៀងអភិរក្សជីវៈចម្រុះព្រៃអង់តែន បានចុះល្បាតបង្ក្រាប និងរឹបអូសបានម៉ាស៊ីនជ្រៀកឈើ និងថាស០១គ្រឿង និងឈើហ៊ុបម៉ៃតាប់ប្រភេទឈើទាលនិងឈើផ្តៀក ប្រវែង៤ម៉្រែត សរុបចំនួន ៩០ ហ៊ុប ចំនែកជនល្មើសបានរត់គេចខ្លួនមុនកំលំាងចូលទៅដល់។ ប្រតិបត្តិការនេះ ត្រូវបានធ្វើឡើងនៅថ្ងៃទី១៨ ខែកុម្ភះ ឆ្នាំ ២០១៩។
សូមបញ្ជាក់ថា ទីតំាងលបលួចតំឡើងម៉ាស៊ីនអាជ្រៀកឈើដោយខុសច្បាប់នេះ ស្ថិតនៅភូមិរ៉ងខ្នាយ ខាងក្រោយវត្តរ៉ងខ្នាយ ប្រហែល ១គីឡូម៉ែត្រ ស្ថិតក្នុងឃុំមានរិទ្ធ ស្រុកសណ្តាន់ ខេត្តកំពង់ធំ ក្នុងដែនសមត្ថកិច្ចរបស់រដ្ឋបាលព្រៃឈើ ទីតំាងនេះកើតមានប្រហែលជាង១ខែមកហើយ បច្ចុប្បន្នវត្ថុតាងបាននិងកំពុងរុះរើ និងដឹកយកមករក្សាទុកនៅមន្ទីរបរិស្ថានខេត្តកំពង់ធំ រៀបចំចងក្រងសំនុំរឿងតាមនីតិវិធីច្បាប់ ស្រាវជ្រាវរកមុខសញ្ញាជនល្មើស កសាងសំនុំរឿងបញ្ជូនទៅសាលាដំបូងខេត្ត ចាត់ការតាមផ្លូវច្បាប់ ៕
លោក តុប កក្តដា ប្រធានមន្ទីរបរិស្ថាន ខេត្តកំពង់ធំ ដឹកនាំមន្រ្តីឧទ្យានុរក្ស បង្រ្កាបទីតាំង លួចតំឡើង ម៉ាស៊ីនជ្រៀកឈើ
Filed in: ព័ត៌មានជាតិ