ខេត្តព្រះសីហនុ ៖នៅវេលាម៉ោង ៨:៣០នាទី ថ្ងៃទី១៨ ខែកុម្ភៈ ឆ្នាំ២០១៩ នេះ រថយន្តធំ តូចចំនួន២គ្រឿងបុកគៀគ្នាពេញទំហឹង បណ្តាលធ្លាក់ផ្លូវទាំងពីរគ្រឿង ប៉ុន្តែហេងណាស់មិនមានមនុស្សស្លាប់ទេ គ្រាន់តែរបួសស្រាលនិងខូចខាតរថយន្តទាំងពីរ ។ ហេតុការណ៍នេះកើតឡើងនៅតាមផ្លូវជាតិលេខ៤ គីឡូម៉ែត្រ ១៧៦-១៧៧ ភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ នៅវេលាម៉ោង ៨:៣០នាទី ថ្ងៃទី១៨ ខែកុម្ភៈ ឆ្នាំ២០១៩នេះ។
របាយការណ៍ប៉ូលីសចរាចរណ៍ខេត្តព្រះសីហនុបានឲ្យដឹងថា មានគ្រោះថ្នាក់ចរាចរណ៍មួយករណីទៀតកើតឡើង រវាងរថយន្ត ១គ្រឿងម៉ាក PRIUS ពណ៌ស គ្មានផ្លាកលេខ អ្នកបើកបរឈ្មោះ សុង សំ ភេទប្រុស អាយុ៣៧ឆ្នាំ មានទីលំនៅស្រុកកំពង់សិលា ខេត្តព្រះសីហនុ មានទិសដៅពីក្រុងព្រះសីហនុ ទៅស្រុកកំពង់សិលា។ លុះដល់ចំណុចខាងលើ បានបត់ឆ្វេង ឆ្លងកាត់ផ្លូវ បន្ទាប់មកក៏មានរថយន្តធុនធំ បើកមកពីខាងក្រោយជ្រុលចង្កូតកៀរធ្លាក់ផ្លូវទាំងពីរ រថយ្តធំម៉ាក HYUNDAI ពណ៌ស គ្មានផ្លាកលេខ អ្នកបើកបរឈ្មោះ ជា រ៉ាវី ភេទប្រុស អាយុ២៥ឆ្នាំ មានទីលំនៅស្រុកគងពិសី ខេត្តកំពង់ស្ពឺ។ គ្រោះថ្នាក់នេះពុំបណ្ដាលឲ្យមានអ្នករងរបួសទេ ប៉ុន្តែរថយន្ត២គ្រឿង បានរងការខូចខាត៕
