ខេត្តបន្ទាយមានជ័យ ៖ សមត្ថកិច្ចការពារព្រំដែនកម្ពុជា និងសមត្ថកិច្ចការពារព្រំដែនថៃ ប្រឈមមុខតានតឹងដាក់គ្នា នៅពេលសមត្ថកិច្ចថៃយកត្រាក់ទ័រមួយគ្រឿង បម្រុងឈូសឆាយដំឡូងមីរបស់កសិករខ្មែរ នៅតំបន់បន្ទាត់ព្រំដែនកម្ពុជា-ថៃ ក្នុងភូមិសាស្រ្តខេត្តបន្ទាយមានជ័យឈមនិងខេត្តស្រះកែវ ប្រទេសថៃ។សភាពការណ៍តានតឹងដាក់គ្នារវាងសមត្ថកិច្ចកម្ពុជានិងថៃបានធូស្រាលឡើងវិញ ក្រោយសមត្ថកិច្ចទាំង២បានឯកភាពគ្នាឱ្យកសិករខ្មែរដក់ដំឡូងមីចេញ។
ប៉ូលការពារព្រំដែនថៃកងរយលេខ១២៦ មានគ្នាប្រមាណ២៩នាក់ បានយកត្រាក់ទ័រ១គ្រឿង បម្រុងឈូសឆាយកំទេចចោល ដោយប៉ូលីសថៃចោទពលរដ្ឋខ្មែរ ថាបានដាំដំឡូងមី លើដីបន្ទាត់ព្រំដែន មិនទាន់ច្បាស់លាស់ ខណៈនោះគេឃើញមាននគរបាលការពារព្រំដែនលេខ៩១១ និងយោធាការពារព្រំដែនលេខ៥០៣ របស់កម្ពុជា ប្រមាណ១៥នាក់ បានចុះទៅរារាំងមិនឱ្យប៉ូលីសថៃយកត្រាក់ទ័រទៅឈូសឆាយដំឡូងមីលសិករខ្មែរនោះឡើយ ។
ឈរស្មារតីយោគយល់គ្នា ភាគីទាំងពីរបានឯកភាពតម្រូវឱ្យពលរដ្ឋខ្មែរដកដំឡូងមីនោះចោលហើយកសិករខ្មែរក៏បានយល់ព្រមដកដំឡូងមីនោះចោល មិនឱ្យលើសពីមួយអាទិត្យនោះឡើយ បញ្ហានេះដោយមុនដំដូងសមត្ថកិច្ចថៃទាមទារដកដំឡូងមីចោលជម្រៅ១៥០ម៉ែត្រប្រវែង៥៥០ម៉ែត្រប្របតាមផ្លូវគ្រួសក្រហម។ក្រោយមកបានឯកភាពគ្នាឱ្យដកជម្រៅ៥០ម៉ែត្រប្រវែងបណ្តោយ៥៥០ម៉ែត្រ។ហេតុការណ៍នោះកើតឡើងកាលពីរសៀលថ្ងៃទី១៦ ខែកុម្ភៈ ឆ្នាំ២០១៩ នៅចំណុចខ្សែបន្ទាត់ព្រំដែនកម្ពុជា-ថៃ ចន្លោះបង្គោលសីម៉ាលេខ៤២និង៤៣ក្នុងភូមិល្បើកស្វាយ ឃុំស្វាយចេក ស្រុកស្វាយចេក ខេត្តបន្ទាយមានជ័យ ឈមទឹកដីថៃភូមិណងយ៉ាកែវ ឃុំគោកធ្យូង ស្រុកគោកធ្យូង ខេត្តស្រះកែវ ប្រទសថៃ។
ជុំវិញបញ្ហានេះ បើតាមការបញ្ជាក់ឱ្យដឹងពីសមត្ថកិច្ចកម្ពុជានៅជួរមុខប្រាប់ឱ្យដឹងថា ពលរដ្ឋខ្មែរដែលបានទៅដាំដំឡូងមីមានបញ្ហានៅលើដីជាប់ព្រំដែនកម្ពុជា-ថៃមានចំនួន២គ្រួសារ ពួកគាត់រស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដាំដុះដំឡូងមីលើផ្ទៃដីប្រមាណ៦ហិតា។ បញ្ហានោះផងដែរ សមត្ថកិច្ចថៃគេបានមកជួបជជែកជាមួយសមត្ថកិច្ចកម្ពុជាយើង២លើកមកហើយ សុំឱ្យកសិករខ្មែរដកដំឡូងមីនោះចោលនៅចំណុចបន្ទាត់ព្រំដែនមិនទាន់ឯកភាពគ្នា ដោយសុំរក្សាទុកទ្រង់ទ្រាយដើមមិនឱ្យមានការប្រែប្រួលការឈូសឆាយព្រៃនៅតាមបន្ទាត់ព្រំដែននោះឡើយ យោងតាមអនុសារណៈយោគយល់គ្នារវាងកម្ពុជានិងថៃ លើបញ្ហាព្រំដែនមិនទាន់ច្បាស់លាស់ទុកឱ្យគណៈកម្មការព្រំដែនប្រទេសទាំង២ជាអ្នកដោះស្រាយ។
សមត្ថកិច្ចកម្ពុជាធ្លាប់បានទៅប្រាប់កសិករខ្មែរទាំង២គ្រួសារនោះរួចមកហើយ បើឈូសឆាយដីដាំដំឡូងមីគឺសុំរក្សាទុកព្រៃខ្លះ កុំឱ្យភាគីថៃគេរករឿង ប៉ុន្តែក្រោយមកឃើញកសិករខ្មែរបានទៅឈូសឆាយព្រៃអស់ទាំងស្រុងរ៉បនិងផ្លូវគ្រួសក្រហមរបស់ភាគីថៃដែលបានកសាងឡើង៕
