ខេត្តសៀមរាប ៖ ឈ្មួញជីកដីលក់មានរណ្ដៅជ្រៅចាល់ក្បាលប្រែតរាប់សិបកន្លែងក្នុងខេត្តសៀមរាប និងមានទំហំធំប៉ុនមហាមេឃ បានកំពុងតែប្រព្រឹត្តខុសទៅនិងច្បាប់ភូមិបាល ខុសទៅច្បាប់រ៉ែ ថាមពល យ៉ាងគឃ្លើន បែរជាលោក ជូ រ៉ាម៉ី ប្រធានមន្ទីររ៉ែ ថាមពលខេត្តសៀមរាប អង្គុយតែក្នុងការិយាល័យ មិនព្រមចុះទៅពិនិត្យដល់ទីតាំងនោះទេ បណ្ដោយអោយឈ្មួញជីកដី មានជំរៅជ្រៅតាមតែទំនើងចិត្ត មិនខុសពីសម្ដេច បានលើកក្នុងអង្គប្រជុំថា ជាមន្រ្ដីជើង១០ អង្គុយចាំទទួលតែរបាយការណ៍ភូតភរ ពីមន្រ្ដីគ្រាប់ល្ពៅ និងខ្លាចប៉ះកំដៅថ្ងៃ។
ជាក់ស្ដែង រណ្ដៅដីគ្មានច្បាប់អនុញាតិ មួយកន្លែង ដែលមាន មា្ចស់ឈ្មោះ ចំរើន ស្ថិតនៅភូមិគោកដូង ឃុំគោកដូង ស្រុកពួក ខេត្តសៀមរាប កំពុងតែជីកដីមានជំរៅជ្រៅខុសពីបទដ្ឋានច្បាប់ និងដឹកជញ្ចូនយ៉ាងសកម្ម រាប់រយឡានក្នុង១ថ្ងៃៗ ធ្វើអោយដីហុយ ប៉ះពាល់ដល់សុខភាពពលរដ្នទៀតផង ជាពិសេសចាស់ជរានិងកុមារ ទោះបីក្រុមឈ្មួញលក់ដីខំស្រោចទឹកផ្លូវយ៉ាងណាក៏ដោយ ក៏នៅតែហុយចូលក្នុងផ្ទះប្រឡាក់ខោអាវដល់ក្នុងទូរនឹងហុយស្ទើរតែពិសាបាយមិនកើត។
មួយវិញទៀតយោងតាមប្រភពពីប្រជាពលរដ្នដែលរស់នៅក្នុងភូមិជាប់នឹងរណ្តៅដី មានការព្រួយបារម្មណ៍ពីសត្វគោក្របីដែលនៅជិតរណ្ដៅដីនេះណាស់ខ្លាចធ្លាក់ចូលច្បាស់ជាងាប់ ព្រោះវាមានជម្រៅជ្រៅហួសហេតុពេក រហូតដល់ជាងដប់ម៉ែត្រឯណោះ។
នៅព្រឹកថ្ងៃសុក្រ ទី១៦ ខែកុម្ភៈ ឆ្នាំ២០១៩ មានគ្រឿងចក្រចំនួន២គ្រឿងកំពុងធ្វើសកម្មភាពកាយយកអាចម៏ដី តែ មិនឃើញមន្រ្ដីជំនាញចុះមកទប់ស្កាត់នោះទេ។
លោក ជូ រ៉ាមី ប្រធានមន្ទីររ៉ែនិងថាមពលខេត្តសៀមរាបបានឆ្លើយតបសំនួរអ្នកកាសែតតាមទូរស័ព្ឌថា រឿងគ្រឿងចក្ររបស់ឈ្មួញឈ្មោះ ចំរើន ខាងលើនេះ លោកពិតជាមិនបានដឹងទេ ចាំលោកអោយជំនាញខាងលោកចុះទៅពិនិត្យមើលសិន។ លោកបន្ដថារឿងគ្រឿងចក្រខាងលើនេះ គឺលោកមិនបណ្តោយអោយធ្វើអាជីវកម្មជាដាច់ខាត ថ្វីថ្បិតតែបានស្នើរសុំច្បាប់អនុញាតិក៏ដោយ តែលោក ចំរើន មិនទាន់មានច្បាប់អនុញាតិផង បែរជាហ៊ានធ្វើអាជីវកម្មជីករណ្តៅដីលក់ពេញក្រុងសៀមរាបដែលមិនខ្លាចជំនាញអីបន្តិចណាសោះ។
លោក ស៊ីន ចាន់ថុល អភិបាលរងស្រុកពួក បានប្រាប់ថា គ្រឿងចក្រខាងលើនេះបានដាក់សុំច្បាប់ទៅច្រកចេញចូលតែមួយរបស់សាលាខេត្តដែរ តែមិនទាន់បានច្បាប់នៅឡើយនោះទេ។
ពលរដ្នទន្ទឹងចាំមើលលោក ជូ រ៉ាមី ប្រធានមន្ទីររ៉ែនិងថាមពលខេត្តសៀមរាប តើមានចំណាត់ការយ៉ាងម៉ិចចំពោះឈ្មួញដីដែលហ៊ានបំពាន់ច្បាប់បែបនេះ ឬមួយបានតែនិយាយចោល ?៕
